യുഎഇയുടെ 51 മത് ദേശീയദിനാഘോഷത്തിന്‍റെ ഭാഗമായി ഡിസംബർ 2,3 തിയതികളില്‍ കേരളോത്സവം സംഘടിപ്പിക്കുന്നു. ദുബായ് അൽ ഖിസൈസിലുള്ള ക്രെസെന്‍റ് സ്കൂൾ ഗ്രൗണ്ടിൽ വൈകിട്ട് 4 മണി മുതലാണ് കേരളോത്സവം നടക്കുക. മൂന്നാം തീയ്യതി നടക്കുന്ന സാംസ്കാരിക സമ്മേളനത്തിൽ മുഖ്യാതിഥിയായി ടൂറിസം - പൊതുമരാമത്തു വകുപ്പുമന്ത്രി .പി. എ. മുഹമ്മദ് റിയാസെത്തും. ഇന്ത്യൻ കോൺസുലേറ്റ് പ്രതിനിധികളും മറ്റ് പ്രമുഖരും സമ്മേളനത്തില്‍ പങ്കെടുക്കും. ലു​ലു എ​ക്സ്ചേ​ഞ്ച്, മ​ല​ബാ​ർ ഗോ​ൾ​ഡ് ആ​ൻ​ഡ്​ ഡ​യ​മ​ണ്ട്​​സ്​ എ​ന്നി​വരാണ് മുഖ്യപ്രായോജകർ

ഗായിക പ്രസീത ചാലക്കുടിയും നാടൻപാട്ടു ബാന്‍റായ'കനലും'പാലാപ്പള്ളി' പാട്ടിലൂടെ പ്രസിദ്ധനായ അതുൽ നറുകരയും കേരളോത്സവത്തിന്‍റെ ഭാഗമാകും. 70ൽ പരം കലാകാരന്മാർ അണിനിരക്കുന്ന മെഗാ ശിങ്കാരി - പഞ്ചാരി മേളങ്ങളുടെ അകമ്പടിയോടെയുള്ള സാംസ്കാരിക ഘോഷയാത്രയും നടക്കും. സൈക്കിൾ യജ്‌ഞം, തെരുവ് നാടകങ്ങൾ, കളരിപ്പയറ്റ്, പന്തംതിരി തുടങ്ങിയ നാടൻ കലാരൂപങ്ങള്‍ക്കൊപ്പം, വിവിധ സ്റ്റാളുകളും, ഭക്ഷണ ശാലകളും സജ്ജമാക്കും.

എഴുത്തുകാരും വായനക്കാരും ചേർന്ന് നടത്തുന്ന സാഹിത്യ സംവാദങ്ങൾ ,കവിത ആലാപനങ്ങൾ , പ്രശ്നോത്തരികൾ,പുസ്തകശാല, കേരളത്തിന്‍റെ ചരിത്രവും പോരാട്ടത്തിന്‍റെ നാൾവഴികളും ഉൾകൊള്ളുന്ന ചരിത്ര - പുരാവസ്തു പ്രദർശനങ്ങളും ഇതോടൊപ്പം നടക്കും. ലോകകപ്പ് ഫുട്ബോള്‍ പശ്ചാത്തലത്തില്‍ കാല്പന്തുകളിയുടെ ചരിത്രം വിളിച്ചോതുന്ന പ്രത്യേക പ്രദർശനവും ഒരുക്കിയിട്ടുണ്ട്. ദുബായിലെ മലയാളം മിഷനിലെ കുട്ടികളുടെ കലാപരിപാടികളും നടക്കും.

മലയാളം മിഷനിലേക്കുളള രജിസ്ട്രേഷനും, പ്രവാസികൾക്കായുള്ള സർക്കാർ പദ്ധതികളെ അടുത്തറിയുവാനും പങ്കാളികളാകുവാനുമായി നോർക്ക, പ്രവാസി ക്ഷേമനിധി,കെഎസ്എഫ് ഇ തുടങ്ങിയ പദ്ധതികളുടെ പ്രത്യേക സ്റ്റാളുകളും ഉണ്ടാകും. പ്രവേശനം സൗജന്യമാണ്. സംഘാടക സമിതി ഭാരവാഹികളായ ഒ. വി. മുസ്തഫ, എൻ.കെ. കുഞ്ഞഹമ്മദ്, സജീവൻ കെ. വി, റിയാസ്. സി. കെ, അനീഷ് മണ്ണാർക്കാട് എന്നിവരും, ലുലു എക്സ്ചേഞ്ച്, മലബാർ ഗോൾഡ് & ഡയമണ്ട്സ് പ്രതിനിധികളും വാർത്താസമ്മേളനത്തിൽ പങ്കെടുത്തു