പീക്കി ബ്ലൈൻഡേഴ്സ് സീരീസിലൂടെ ശ്രദ്ധേയയായ പ്രശസ്ത ഇംഗ്ലീഷ് നടി ഹെലൻ മക്ക്രൊറി അന്തരിച്ചു. 52 വയസ്സായിരുന്നു. ക്യാൻസറിനെത്തുടർന്നായിരുന്നു അന്ത്യം. ഭർത്താവ് ഡാമിയൻ ലൂയിസാണ് മരണ വിവരം അറിയിച്ചത്.
'ക്യാൻസർ ബാധയെ തുടർന്നാണ് ഹെലൻ മക്ക്രൊറി മരിച്ചത്. സുഹൃത്തുക്കളുടെയും കുടുംബങ്ങളുടെയും സ്നേഹം ഏറ്റുവാങ്ങിക്കൊണ്ട് സമാധാനപരമായായാണ് അവൾ ഈ ലോകത്ത് നിന്നും വിടവാങ്ങിയത്. മരണത്തെ നിർഭയമായി നേരിട്ടു . അവളുടെ ജീവിതത്തിന്റെ ഭാഗമാകുവാൻ സാധിച്ചതിൽ ദൈവത്തോട് നന്ദി പറയുന്നു. നീ മനോഹരമായി പ്രകാശിച്ചു, വിട'; ഭർത്താവ് ഡാമിയൻ ലൂയിസ് ട്വിറ്ററിൽ കുറിച്ചു.
പീക്കി ബ്ലൈൻഡേഴ്സിലേയും ഹാരി പോട്ടറിലെയും അഭിനയത്തിലൂടെയാണ് ആഗോളതലത്തിൽ ഹെലൻ പ്രേക്ഷകരുടെ കയ്യടി ഏറ്റുവാങ്ങിയത്. പീക്കി ബ്ലൈൻഡേഴ്സിൽ പോളി ഗ്രേ എന്ന കഥാപാത്രമായിരുന്നു ഹെലൻ അവതരിപ്പിച്ചിരുന്നത്. പീക്കി ബ്ലൈൻഡേർസ് ക്രൈം കുടുംബത്തിലെ ട്രെഷറർ ആണ് പൊളി ഗ്രേ. ദ ഹാഫ്-ബ്ലഡ് പ്രിൻസിലൂടെയാണ് ഹാരി പോട്ടർ കുടുംബത്തിന്റെ ഭാഗമായത്. നാടകത്തിലൂടെയാണ് അഭിനയ ജീവിതം ആരംഭിച്ചത്. ജെയിംസ് ബോണ്ട് ചിത്രമായ “സ്കൈഫാൾ”, മാർട്ടിൻ സ്കോർസെസിന്റെ “ഹ്യൂഗോ” എന്നിവയിലും ശ്രദ്ധേയമായ വേഷങ്ങൾ അഭിനയിച്ചിട്ടുണ്ട്.