കുമാരനാശാന്റെ കരുണയില്‍ നിന്ന് പ്രചോദനം ഉള്‍ക്കൊണ്ട് മ്യൂസിക് വീഡിയോ. മോഹന്‍ലാല്‍, സംഗീത സംവിധായകന്‍ ശരത്, അപര്‍ണ ബാലമുരളി എന്നിവരാണ് കാമിതം എന്ന മ്യൂസിക് വീഡിയോ പുറത്തിറക്കിയത്.
ഉപഗുപ്തന്റെയും വാസവദത്തെയുടെയും കഥയിലൂടെ പ്രണയത്തിന്റെ ഭാഷ കാലാതീതമാണെന്ന് പറഞ്ഞുവെക്കുകയാണ് കാമിതം എന്ന മ്യൂസിക് വീഡിയോ. രാഖി കൃഷ്ണയാണ് ഗാനരചനയും മ്യൂസിക് വീഡിയോയുടെ സംവിധാനവും. വിദ്യാധരന്‍ മാസ്റ്ററുടെ സംഗീതത്തിലാണ് ഗാനം. തുടക്കക്കാരില്‍ നിന്നുള്ള ആല്‍ബം എന്ന നിലക്ക് മനോഹരമാണ് കാമിതമെന്ന് മോഹന്‍ലാല്‍ ഫേസ്ബുക്കില്‍ കുറിച്ചു.
പ്രണയദിനത്തിന് മുന്നോടിയായാണ് കാമിതം പുറത്തിറക്കിയിരിക്കുന്നത്. സത്യം ഓഡിയോസ് യൂട്യൂബ് ചാനലില്‍ കാമിതം കാണാം. ഛായാഗ്രഹണവും എഡിറ്റിങ്ങും നിര്‍വ്വഹിച്ചിരിക്കുന്നത് സുദീപ് ഇ എസ് ആണ്. ദൃശ്യം ഫെയിം റോഷന്‍ ബഷീറാണ് ഉപഗുപ്തനായി അഭിനയിച്ചിരിക്കുന്നത്. ഗോപിക അനില്‍, ദേവി ചന്ദ്രന്‍ എന്നിവരാണ് മറ്റ് അഭിനേതാക്കള്‍.