വിജയ് സേതുപതിയെ നായകനാക്കി എം.മണികണ്ഠന്‍ സംവിധാനം ചെയ്യുന്ന 'കടൈസി വിവസായി' എന്ന ചിത്രത്തിനെതിരെ പരാതിയുമായി സംഗീത സംവിധായകന്‍ ഇളയരാജ. ചിത്രത്തില്‍ നിന്ന് ഇളയരാജയെ നീക്കം ചെയ്തത് അറിയിച്ചില്ലെന്ന് ചൂണ്ടിക്കാട്ടിയാണ് പരാതി. തമിഴ്നാട് മ്യൂസിക് യൂണിയനിലാണ് ഇളയരാജ പരാതി നല്‍കിയിരിക്കുന്നത്.

ഇളയരാജയായിരുന്നു ചിത്രത്തില്‍ ആദ്യം സംഗീത സംവിധായകന്‍. എന്നാല്‍ സിനിമക്കായി അദ്ദേഹം ചെയ്ത ഈണങ്ങള്‍ അണിയറപ്രവര്‍ത്തകര്‍ക്ക് ഇഷ്ടപ്പെട്ടില്ല. ഇതേ തുടര്‍ന്ന് സന്തോഷ് നാരായണനെ സംഗീത സംവിധായകനാക്കുകയായിരുന്നു.

അടുത്തിടെ പുറത്തിറങ്ങിയ സിനിമയുടെ ട്രെയ്‌ലറില്‍ സന്തോഷ് നാരായണന്റെ പേരാണ് രേഖപ്പെടുത്തിയിട്ടുള്ളത്. ഇത് തന്റെ അനുവാദമോ അറിവോ ഇല്ലാതെയാണ് അണിയറ പ്രവര്‍ത്തകര്‍ ചെയ്തതെന്നാണ് ഇളയരാജയുടെ ആരോപണം.