കാലടി മണപ്പുറത്ത് ഒരുക്കിയ ടൊവിനോ തോമസ് ചിത്രം മിന്നല് മുരളിയുടെ കൂറ്റന് സെറ്റ് ഹിന്ദുത്വസംഘടന തകര്ത്തതില് പ്രതിഷേധമറിയിച്ച് സംവിധായകന്.
എന്താ പറയേണ്ടത് എന്നറിയില്ല. ചിലര്ക്കിത് തമാശയാവാം,ട്രോള് ആവാം, പബ്ലിസിറ്റി ആവാം,രാഷ്ട്രീയം ആവാം,പക്ഷെ ഞങ്ങള്ക്ക് ഇതൊരു സ്വപ്നം ആയിരുന്നുവെന്ന് ബേസില് ജോസഫ്. 50 ലക്ഷത്തോളം മുടക്കി 100ലേറെ പേരുടെ ശ്രമഫലമായി സജ്ജീകരിച്ച പള്ളിയുടെ സെറ്റ് ആണ് രാഷ്ട്രീയ ബജ്റംഗ്ദള് അടിച്ചുതകര്ത്തത്. ഹിന്ദുവിന്റെ സ്വാഭിമാനം രക്ഷിക്കാനെന്ന വര്ഗീയ വിദ്വേഷ പ്രചരണവും സംഘടന സാമൂഹിക മാധ്യമങ്ങളില് ഉന്നയിക്കുന്നു
ബേസില് ജോസഫിന്റെ പ്രതികരണം
എന്താ പറയേണ്ടത് എന്നറിയില്ല. ചിലര്ക്കിത് തമാശയാവാം,ട്രോള് ആവാം, പബ്ലിസിറ്റി ആവാം,രാഷ്ട്രീയം ആവാം,പക്ഷെ ഞങ്ങള്ക്ക് ഇതൊരു സ്വപ്നം ആയിരുന്നു. കഴിഞ്ഞ ദിവസം വരെ ഈ ഫോട്ടോ കാണുമ്പോള് ഒരു ഇത് നമ്മളുടെ സിനിമയുടെ സെറ്റ് ആണല്ലോ എന്നോര്ത്തു അഭിമാനവും,ഷൂട്ടിങ്ങിനു തൊട്ടു മുന്പ് ലോക്ക്ഡൌണ് സംഭവിച്ചതിനാല് 'ഇനി എന്ന്' എന്നോര്ത്തു കുറച്ചു വിഷമവും ഒക്കെ തോന്നുമായിരുന്നു.ചെയ്യുന്നത് ഒരു ചെറിയ സിനിമ അല്ല എന്ന് ധാരണയുള്ളത് കൊണ്ട്, രണ്ടു വര്ഷമായി ഈ സിനിമക്ക് വേണ്ടി പണിയെടുക്കാന് തുടങ്ങിയിട്ട്. ഒരുപാട് വിയര്പ്പൊഴുക്കിയിട്ടുണ്ട് ഇതിനു വേണ്ടി. ആര്ട് ഡിറക്ടറും സംഘവും പൊരി വെയിലത്തു നിന്ന് ദിവസങ്ങളോളം പണിയെടുത്തതാണ്. പ്രൊഡ്യൂസര് കഷ്ടപ്പെട്ട് ഉണ്ടാക്കിയ കാശാണ്. എല്ലാ പെര്മിഷനുകളും ഉണ്ടായിരുന്നതാണ്. ഒരു മഹാമാരിയോടുള്ള വലിയൊരു പോരാട്ടം നടക്കുന്ന സമയത്തു , എല്ലാവരും നിസ്സഹായരായി നില്കുന്ന സമയത്തു , ഒരുമിച്ചു നില്ക്കേണ്ട സമയത്തു , ഇങ്ങനെയൊക്കെ സംഭവിക്കും എന്ന് സ്വപ്നത്തില് പോലും പ്രതീക്ഷിച്ചിട്ടില്ല,പ്രത്യേകിച്ച് നമ്മുടെ കേരളത്തില്. നല്ല വിഷമമുണ്ട്. ആശങ്കയും .
ലോക്ക് ഡൗണ് നിയന്ത്രണങ്ങള് ലംഘിച്ച് കാലടി മണപ്പുറത്തെ സെറ്റ് കൂടം ഉപയോഗിച്ചും ഇരുമ്പുവടികളുമായി തകര്ക്കുന്ന ചിത്രങ്ങളാണ് എ എച്ച് പി നേതാവ് ഹരി പാലോട് ഫേസ്ബുക്കില് പോസ്റ്റ് ചെയ്തിരിക്കുന്നത്. സൂപ്പര് ഹീറോ കഥാപാത്രമായി ടൊവിനോ തോമസ് എത്തുന്ന ചിത്രം ബേസില് ജോസഫാണ് സംവിധാനം ചെയ്യുന്നത്. വയനാട്ടില് ആദ്യ ഷെഡ്യൂള് പൂര്ത്തിയാക്കിയ മിന്നല് മുരളിയുടെ രണ്ടാം ഘട്ട ചിത്രീകരണമാണ് മണപ്പുറത്തെ സെറ്റില് നടക്കേണ്ടിയിരുന്നത്. ചിത്രീകരണം ലോക്ക് ഡൗണ് പ്രഖ്യാപിച്ചതിനെ തുടര്ന്ന് മുടങ്ങുകയായിരുന്നു.