ചൈനയില്‍ ശനിയാഴ്ച മാത്രം 99 പേരില്‍ കൊവിഡ് 19 സ്ഥിരീകരിച്ചു. മുന്‍ ദിവസങ്ങളിലെ കണക്കുകളുമായി താരതമ്യം ചെയ്യുമ്പോള്‍ വന്‍വര്‍ധനവാണ് രോഗികളുടെ എണ്ണത്തില്‍ ഉണ്ടായിരിക്കുന്നത്. രോഗം സ്ഥിരീകരിച്ച 99 പേരില്‍ 63 പേരും പ്രകടമായ രോഗലക്ഷണങ്ങള്‍ ഇല്ലാത്തവരായിരുന്നു എന്നതാണ് ആശങ്കയ്ക്ക് കാരണമായിരിക്കുന്നത്. ഇതില്‍ രണ്ട് പേര്‍ക്ക് മാത്രമാണ് സമ്പര്‍ക്കത്തിലൂടെ രോഗം വന്നതെന്നും, 97 പേരും വിദേശത്തു നിന്നെത്തിയവരാണെന്നും നാഷ്ണല്‍ ഹെല്‍ത്ത് കമ്മീഷന്‍ പുറത്തുവിട്ട റിപ്പോര്‍ട്ട് പറയുന്നു.

ചൈനയുടെ വാണിജ്യ കേന്ദ്രമായ ഷാങ്ഹായിലാണ് കൂടുതല്‍ കേസുകള്‍ റിപ്പോര്‍ട്ട് ചെയ്തിരിക്കുന്നത്. 52 പേര്‍ക്കാണ് ശനിയാഴ്ച മാത്രം ഇവിടെ രോഗം സ്ഥിരീകരിച്ചത്. വിദേശത്തു നിന്നെത്തുന്നവരിലൂടെ കൊവിഡ് 19 വീണ്ടും രാജ്യത്ത് പിടിയുറപ്പിക്കുകയാണോ എന്ന ആശങ്കകള്‍ക്കാണ് പുതിയ കണക്കുകള്‍ വഴിവെച്ചിരിക്കുന്നത്.

നാഷണല്‍ ഹെല്‍ത്ത് കമ്മീഷന്റെ കണക്കുകള്‍ പ്രകാരം ഇതുവരെ ചൈനയ്ക്ക് പുറത്തു നിന്ന് വന്നവരില്‍ 1280 പേര്‍ക്കാണ് കൊവീഡ് സ്ഥിരീകരിച്ചിരിക്കുന്നത്. ഇതില്‍ 481 പേര്‍ രോഗമുക്തരായി. ചികിത്സയിലുള്ള 799 പേരില്‍ 36 പേരുടെ നില ഗുരുതരമാണ്. നിലവില്‍ വിദേശത്തു നിന്നെത്തുന്നവരെ 14 ദിവസത്തെ ക്വാറന്റൈന് ശേഷമാണ് വീടുകളിലേക്ക് പോകാന്‍ അനുവദിക്കുന്നത്.