കാലടി സര്വകലാശാലയിലെ നിയമനവിവാദവുമായി ബന്ധപ്പെട്ട് എം.ബി.രാജേഷ് നടത്തിയ വിശദീകരണത്തില് മറുപടിയുമായി ഇന്റര്വ്യൂ ബോര്ഡില് ഉണ്ടായിരുന്ന ഡോ.ഉമര് തറമേല്. വാര്ത്താസമ്മേളനത്തില് ആരോപിച്ച കാര്യങ്ങള് തെളിയിക്കാന് കഴിയുമോയെന്ന് ഫെയ്സ്ബുക്ക് പോസ്റ്റില് ഡോ.ഉമര് തറമേല് ചോദിക്കുന്നു.
'താല്പര്യമുള്ള ഒരു ഉദ്യോഗാര്ഥിക്ക് വേണ്ടി ശ്രീമതി നിനിതയോട് പിന്മാറാന് അപേക്ഷിക്കും മട്ടില് ഞങ്ങള് സബ്ജക്ട് എക്സ്പേര്ട്സ് ഉപജാപം നടത്തി എന്നത് തെളിയിക്കാന് കഴിയുമോ? ഞങ്ങള് ഏതായാലും അങ്ങനെയൊരാളെ ചുമതലപ്പെടുത്തയിട്ടില്ല. താങ്കള് ആരോപിച്ച പ്രകാരം സംഭവിച്ചിട്ടുണ്ടെങ്കില്, വൈസ് ചാന്സല ര്ക്ക് അയച്ച കത്ത് അയാള്ക്ക് എവിടുന്നു കിട്ടിയെന്നും, അറിയേണ്ടതുണ്ട്. പൊതു നിരത്തില്, നിരത്തപ്പെടുന്ന കാര്യങ്ങളൊന്നും ദയവായി ഞങ്ങളുടെ തലയില് കെട്ടിവെക്കാതിരിക്കുക', പോസ്റ്റില് പറയുന്നു.
ഇന്റര്വ്യൂ ബോര്ഡില് ഉണ്ടായിരുന്ന വിഷയവിദഗ്ധരായ മൂന്നു പേരില് ഒരാള്ക്ക് താല്പര്യമുള്ളയാള്ക്ക് നിയമനം നല്കാനുള്ള ശ്രമമാണ് ഉണ്ടായതെന്നായിരുന്നു എം.ബി.രാജേഷ് കഴിഞ്ഞ ദിവസം വാര്ത്താസമ്മേളനത്തില് പറഞ്ഞത്. മൂന്നു പേരും ഉപജാപം നടത്തിയെന്നും എം.ബി.രാജേഷ് ആരോപിച്ചിരുന്നു. മൂന്ന് പേരുടെ വ്യക്തിപരമായ താല്പര്യത്തില് നിന്നുണ്ടായ വിഷയമാണ്. സ്വാഭാവികമായിട്ടും ഒരു പ്രശ്നം കയ്യില് കിട്ടിയപ്പോള് പ്രതിപക്ഷം രാഷ്ട്രീയമായി ഉപയോഗിക്കുകയും ചെയ്തു. തെരഞ്ഞെടുപ്പ് സമയത്ത് കിട്ടുന്നതെന്തും ഉപയോഗിക്കുക എന്നത് സ്വാഭാവികമാണ്. നിയമനം നല്കാന് ശ്രമിക്കുന്ന ആളുടെ ഒപ്പം ജോലി ചെയ്യുന്ന ആള്ക്ക് ജോലി നല്കാനാണ് ശ്രമം നടന്നത്. വിഷയവിദഗ്ധരായ മൂന്നു പേര്ക്കും ഇയാളുമായി ബന്ധമുണ്ടായിരുന്നുവെന്നും എം.ബി.രാജേഷ് ആരോപിച്ചിരുന്നു.
ഡോ.ഉമര് തറമേലിന്റെ പോസ്റ്റിന്റെ പൂര്ണരൂപം:
'മുന് എം.പി, ബഹു. എം.ബി.രാജേഷ് ഇന്നലെ നടത്തിയ പത്രസമ്മേളനം-സൂചന.
താങ്കളോടുള്ള എല്ലാ ബഹുമാനവും സ്നേഹവും നിലനിര്ത്തിക്കൊണ്ട് തന്നെ പറയട്ടെ, ഇന്നലെ താങ്കള് പത്ര സമ്മേളനത്തില് ആരോപിച്ച ഇക്കാര്യങ്ങള് ശരിയാണെന്നു തെളിയിക്കാന് താങ്കള്ക്ക് കഴിയുമോ. ഞങ്ങള്ക്ക് താല്പര്യമുള്ള ഒരു ഉദ്യോഗാര്ഥിക്ക് വേണ്ടി ശ്രീമതി നിനിതയോട് പിന്മാറാന് അപേക്ഷിക്കും മട്ടില് ഞങ്ങള് സബ്ജക്ട് എക്സ്പേര്ട്സ് ഉപജാപം നടത്തി എന്നത്. ഞങ്ങള് ഏതായാലും അങ്ങനെയൊരാളെ ചുമതലപ്പെടുത്തയിട്ടില്ല. താങ്കള് ആരോപിച്ച പ്രകാരം സംഭവിച്ചിട്ടുണ്ടെങ്കില്, വൈസ് ചാന്സലര്ക്ക് അയച്ച കത്ത് അയാള്ക്ക് എവിടുന്നു കിട്ടിയെന്നും, അറിയേണ്ടതുണ്ട്.
മറ്റൊന്ന്, 2019 ഓഗസ്റ്റ് 31 ന് ഈ നടന്ന പോസ്റ്റുകളുടെ അപേക്ഷാ പരസ്യം വരുന്നത് എന്നാണ് ഞാന് മനസ്സിലാക്കുന്നത്.ആക്കാലത്ത് കാലിക്കറ്റ് സര്വകലാശാലയിലുള്ള ഏത് ഉദ്യോഗാര്ഥിക്കും പഠനവകുപ്പിലെ ഏതു അധ്യാപകരില് നിന്നും ഒരു സ്വഭാവ സര്ട്ടിഫിക്കേറ്റ് വാങ്ങി അയക്കാം, അത്രേയുള്ളൂ. ഇവിടെ സബ്ജക്ട് എക്സ്പേര്ട് ആയി വരേണ്ടി വരും എന്നു നിനച്ചു ചെയ്യുന്നതായിരിക്കുമോ ഇത്തരം പണികള്.
അതുപോട്ടെ, ഞാന് നുഴഞ്ഞു കയറി ബോര്ഡില് വന്നതാണോ, സര്വകലാശാല വൈസ് ചാന്സലര് വിളിച്ചിട്ട് വന്നതല്ലേ? താന്താന് ജോലി ചെയ്യുന്ന സര്വകലാശാലയിലൊഴികെ ഏതു സര്വകലാശാലയിലും സബ്ജക്ട് എക്സ്പേര്ട് ആയി വിളിക്കാം എന്നാണ് ഞാന് മനസ്സിലാക്കി വെച്ചിട്ടുള്ളത്. ഇതൊക്കെ സ്വജന പക്ഷപാതമായി പൊതു സമൂഹത്തില് അവതരിപ്പിക്കപ്പെടുന്നതിന്റെ യുക്തി എന്താണ്, എന്നു ഞങ്ങള്ക്ക് മനസ്സിലായിട്ടില്ല. പിന്നെ, നിനിത എന്ന ഉദ്യോഗാര്ഥിയുടെ പിഎച്ച്ഡി യോഗ്യതയെയോ മറ്റു കഴിവുകളെയോ ഒന്നും ഞങ്ങള് എക്സ്പേര്ട്ടുകള് തള്ളിപ്പറഞ്ഞിട്ടില്ല. പൊതു നിരത്തില്, നിരത്തപ്പെടുന്ന കാര്യങ്ങളൊന്നും ദയവായി ഞങ്ങളുടെ തലയില് കെട്ടിവെക്കാതിരിക്കുക.
(ഇത്തരം വിവാദ /സംവാദങ്ങളില് നിന്നും ഒഴിവാകുന്നതാണ് ഞങ്ങളുടെ സന്തോഷം. ഞങ്ങളുടെ ജോലി വേറെയാണ്. അതുകൊണ്ട് തന്നെയാണ് മാധ്യമങ്ങളുടെ 'വിസിബിലിറ്റി'യില്നിന്നും മാറിനില്ക്കുന്നത്. ഞങ്ങളെ ഏല്പിച്ച കാര്യം പൂര്ത്തിയാക്കി. അതില്വന്ന ഒരാപകത ചൂണ്ടിക്കാട്ടി. അത്രയുള്ളൂ. അക്കാഡമികചര്ച്ചകളിലൂടെ സംഭവിക്കേണ്ടതും പരിഹൃതമാകേണ്ടതുമായ ഒരു പ്രശ്നം കക്ഷി /മുന്നണി /തെരഞ്ഞെടുപ്പ് രാഷ്ട്രീയ കോലാഹലങ്ങളിലേയ്ക്ക് വലിച്ചുകൊണ്ട് പോയത് ഞങ്ങള് അല്ല. ഇത്തരം കാര്യങ്ങളിലൊന്നും ഞങ്ങള്ക്ക് ഒരു താല്പര്യവുമില്ല. അത് കേരളത്തിന്റെ പ്രത്യേക രാഷ്ട്രീയ കാലാവസ്ഥയുമായി സംഭവിക്കുന്നതാണ്, എന്നു കൂടി ആവര്ത്തിക്കുന്നു.'
ക്യു’ ഇപ്പോള് ടെലഗ്രാമിലും ലഭ്യമാണ്. കൂടുതല് വാര്ത്തകള്ക്കും അപ്ഡേറ്റുകള്ക്കുമായി ടെലഗ്രാം ചാനല് സബ്സ്ക്രൈബ് ചെയ്യാം
Umer Tharamel On MB Rajesh's Response