കോട്ടയം ചങ്ങനാശ്ശേരി മാടപ്പള്ളിയില് കെ റെയില് സര്വേ കല്ലിടലിനെതിരെ പ്രതിഷേധിച്ച ജിജി ഫിലിപ്പിനെതിരെ കേസ്. പ്രതിഷേധം നടക്കുന്നിടത്തേക്ക് കുട്ടിയെയും കൊണ്ടുവന്നതിനാണ് കേസ്. ജുവനൈല് ആക്ട് പ്രകാരമാണ് കേസെടുത്തിരിക്കുന്നത്.
എട്ട് വയസുകാരി സോമിയയുമായാണ് ജിജി പ്രതിഷേധിക്കാനെത്തിയത്. സര്വേ കല്ല് പിഴുതെടുത്തതിനും കേസെടുത്തിട്ടുണ്ട്. പ്രതിഷേധക്കാര്ക്കൊപ്പം പരസ്യമായി കല്ല് പിഴുതുമാറ്റിയ കോണ്ഗ്രസ് ഡിസിസി പ്രസിഡന്റിനെതിരെയും കേസ് എടുത്തിട്ടുണ്ട്.
എന്നാല് കുട്ടിയെ കൊണ്ട് വന്നതല്ലെന്നും പൊലീസ് തന്നെ വലിച്ചിഴച്ചപ്പോള് കുഞ്ഞ് ഓടിയെത്തിയതാണന്നുമാണ് ജിജി പറഞ്ഞത്.
പ്രതിഷേധത്തനിടെ പൊലീസ് തന്നെ ചെന്നായ്ക്കള് വലിച്ചിഴക്കുന്നത് പോലെയാണ് കൊണ്ടുപോയതെന്ന് കഴിഞ്ഞ ദിവസം ജിജി പറഞ്ഞിരുന്നു.
ടാറിട്ട റോഡിലൂടെ വലിച്ചിഴച്ചുകൊണ്ടുപോയപ്പോള് കൈകളെല്ലാം പൊട്ടി ചോര പൊടിയുകയും വസ്ത്രം സ്ഥാനം മാറിപ്പോവുകയും ചെയ്തിരുന്നു. വനിതാ പൊലീസുകാര്ക്ക് പോലും സഹായിക്കാന് തോന്നിയില്ലെന്നും ജിജി മാധ്യമങ്ങളോട് പറഞ്ഞിരുന്നു.
മാടപ്പള്ളിയില് കെ റെയിലിനെതിരെ പ്രതിഷേധിച്ച 23 പേരെയാണ് പൊലീസ് കസ്റ്റഡിയില് എടുത്തത്. ഇവരെ പിന്നീട് വിട്ടയക്കുകയും ചെയ്തു.