സംസ്ഥാന സര്‍ക്കാരിന്റെ ഐ.ടി. പദ്ധതികളില്‍ നിന്നും പ്രൈസ് വാട്ടര്‍ഹൗസ് കൂപ്പര്‍ കമ്പനിക്ക് വിലക്ക്. രണ്ട് വര്‍ഷത്തേക്കാണ് വിലക്ക് ഏര്‍പ്പെടുത്തിയിരിക്കുന്നത്. സ്വര്‍ണക്കടത്ത് കേസിലെ മുഖ്യപ്രതി സ്വപ്‌ന സുരേഷിന്റെ നിയമനത്തിലെ അപാകത ചൂണ്ടിക്കാട്ടിയാണ് വിലക്ക്.
യോഗ്യതയില്ലാത്ത ആളെ നിയമിച്ചു, കരാര്‍ വ്യവസ്ഥയില്‍ ഗുരുതര വീഴ്ച വരുത്തി എന്നി കാര്യങ്ങളാണ് വിലക്ക് ഏര്‍പ്പെടുത്തുന്നതിനുള്ള കാരണങ്ങളായി ചൂണ്ടിക്കാട്ടിയിട്ടുള്ളത്. കെ ഫോണിലെ കരാറും പുതുക്കില്ല. കെ ഫോണുമായുള്ള കരാര്‍ ഇന്ന് അവസാനിച്ചിരുന്നു. ഇ മൊബിലിറ്റി പദ്ധയില്‍ നിന്നും നേരത്തെ ഒഴിവാക്കിയിരുന്നു.
ഐ.ടി വകുപ്പിന് കീഴിലുള്ള സ്‌പേസ് പാര്‍ക്കില്‍ സ്വപ്‌ന സുരേഷിനെ ഓപ്പറേഷന്‍സ് മാനേജരായി നിയമിച്ചത് പ്രൈസ് വാട്ടര്‍ഹൗസ് കൂപ്പര്‍ കമ്പനി വഴിയായിരുന്നു. വിലക്ക് ഏര്‍പ്പെടുത്തിയുള്ള ഉത്തരവില്‍ സ്വപ്‌നയുടെ പേര് പരാമര്‍ശിക്കുന്നില്ല.
