കുട്ടികള്‍ക്ക് നേരെ നഗ്നതാ പ്രദര്‍ശനം നടത്തിയ കേസില്‍ നടന്‍ ശ്രീജിത്ത് രവി റിമാന്‍ഡില്‍. 14 ദിവസത്തേക്കാണ് തൃശൂര്‍ പോക്‌സോ കോടതി റിമാന്‍ഡ് ചെയ്തത്.
മാനസിക രോഗം കാരണം ചെയ്തുപോയതാണെന്നും ജാമ്യം അനുവദിക്കണമെന്നുമായിരുന്നു ശ്രീജിത്ത് രവി കോടതിയില്‍ വാദിച്ചത്. എന്നാല്‍ കോടതി ജാമ്യം അനുവദിച്ചില്ല.
ജൂലൈ മൂന്നാം തിയതിയാണ് കേസിനാസ്പദമായ സംഭവം. വീണ്ടും ശ്രീജിത്ത് രവി കുട്ടികള്‍ക്ക് നേരെ നഗ്നതാ പ്രദര്‍ശനം നടത്തിയതോടെയാണ് വീട്ടുകാര്‍ പൊലീസില്‍ പരാതിപ്പെട്ടത്.
തൃശൂരിലെ അയ്യന്തോളിലാണ് സംഭവം. കുട്ടികള്‍ സ്‌കൂള്‍ വിട്ട് വരുന്നതിന് മുമ്പ് തന്നെ അയ്യന്തോളിലെ പാര്‍ക്കിന് സമീപത്ത് എത്തിയ ശ്രീജിത്ത് രവി കുട്ടികളെത്തിയ സമയം അവര്‍ക്ക് മുന്നില്‍ വെച്ച് നഗ്നതാ പ്രദര്‍ശനം നടത്തിയ ശേഷം കാറില്‍ പോവുകയായിരുന്നു.
സി.സി.ടി.വി ദൃശ്യങ്ങള്‍ പരിശോധിച്ചപ്പോഴാണ് ശ്രീജിത്ത് രവിയാണ് ചെയ്തതെന്ന് കണ്ടെത്തിയത്. വ്യാഴാഴ്ച രാവിലെയാണ് ശ്രീജിത്ത് രവിയെ അറസ്റ്റ് ചെയ്തത്. കുട്ടികള്‍ പ്രതിയെ തിരിച്ചറിഞ്ഞിട്ടുണ്ടെന്ന് പോലീസ് പറഞ്ഞു.
