ദൃശ്യം രണ്ടാം ഭാഗം ചിത്രീകരണം പൂര്‍ത്തിയായാല്‍ മോഹന്‍ലാല്‍ അഭിനയിക്കുന്നത് ബി ഉണ്ണിക്കൃഷ്ണന്‍ സംവിധാനം ചെയ്യുന്ന ചിത്രത്തില്‍. മോഹന്‍ലാലിന്റെ മാസ് ആക്ഷന്‍ എന്റര്‍ടെയിനറായിരിക്കും സിനിമയെന്നാണ് സൂചന. പുലിമുരുകന് ശേഷം ഉദയകൃഷ്ണയുടെ തിരക്കഥയില്‍ മോഹന്‍ലാല്‍ നായകനാകുന്ന ചിത്രവുമാണ് ഒരുങ്ങുന്നത്. നിലവില്‍ തൊടുപുഴയില്‍ ചിത്രീകരണം പുരോഗമിക്കുന്ന ദൃശ്യം സെക്കന്‍ഡ് പൂര്‍ത്തിയാക്കി നവംബര്‍ പകുതിയോടെ മോഹന്‍ലാല്‍ ബി ഉണ്ണിക്കൃഷ്ണന്‍ ചിത്രത്തിന്റെ ഭാഗമാകുമെന്നറിയുന്നു.
മാടമ്പി, ഗ്രാന്‍ഡ്മാസ്റ്റര്‍,മിസ്റ്റര്‍ ഫ്രോഡ്, വില്ലന്‍ എന്നീ സിനിമകള്‍ക്ക് ശേഷം ബി ഉണ്ണിക്കൃഷ്ണനും മോഹന്‍ലാലും കൈകോര്‍ക്കുന്ന അഞ്ചാമത്തെ ചിത്രവുമാണിത്. തെന്നിന്ത്യന്‍ സിനിമയിലെ മുന്‍ നിര താരങ്ങളും മോഹന്‍ലാലിനൊപ്പം ചിത്രത്തിലുണ്ടാകും. കൊവിഡ് കാലത്ത് മലയാളത്തില്‍ പ്രഖ്യാപിക്കപ്പെടാനിരിക്കുന്ന ഏറ്റവും വലിയ പ്രൊജക്ടുമാണ് ബി ഉണ്ണിക്കൃഷ്ണന്റെ സംവിധാനത്തില്‍ ഒരുങ്ങുന്നത്.
സിനിമയിലെ മോഹന്‍ലാലിന്റെ ഗെറ്റപ്പും ടൈറ്റിലും ഉടന്‍ പുറത്തുവരും. മരക്കാര്‍ അറബിക്കടലിന്റെ സിംഹം, റാം എന്നീ സിനിമകളിലാണ് ദൃശ്യം സെക്കന്‍ഡിന് മുമ്പ് മോഹന്‍ലാല്‍ അഭിനയിച്ചത്. റാം വിദേശ ഷെഡ്യൂളുകള്‍ ഉള്ളതിനാല്‍ നീട്ടിവച്ചിരിക്കുകയാണ്.
