ദുബായ് ഇലക്ട്രിസിറ്റി ആൻഡ് വാട്ടർ അതോറിറ്റിയുടെ നേതൃത്വത്തില് ഊർജ്ജ ജല സാങ്കേതിക മേഖലയിലെ പരിസ്ഥിതി സൗഹൃദ പദ്ധതികള് പരിചയപ്പെടുത്തി ദുബായില് നടന്ന വാട്ടർ എനർജി ടെക്സനോളജി ആന്റ് എന്വയോണ്മെന്റ് എക്സിബിഷന് ഇന്ന് സമാപനം. വെറ്റെക്സിന്റെ 24 മത് എഡിഷനാണ് ഇത്തവണത്തേത്. 55 രാജ്യങ്ങളില് നിന്നുളള 1750 കമ്പനികളാണ് വേള്ഡ് ട്രേഡ് സെന്ററില് മൂന്ന് ദിവസം നീണ്ടു നിന്ന പ്രദർശത്തില് പങ്കെടുത്തത്.
പ്രകൃതിയോട് ഇണങ്ങിയുളള ഹരിത സാങ്കേതിക വിദ്യകള്, ജലശുദ്ധീകരണം, ഊർജ്ജ പുനരുപയോഗം, നിർമ്മിത ബുദ്ധി തുടങ്ങി വിവിധ മേഖലകളിലെ പുതിയ സാങ്കേതിക വിദ്യകളും ഉല്പന്നങ്ങളും ലോകത്തെ വിവിധ കമ്പനികള്ക്ക് പ്രദർശിപ്പിക്കാനുളള അവസരമാണ് വെറ്റൈക്സ്. ദുബായ് ക്ലീന് എനർജി സ്ട്രാറ്റജി 2050 ദുബായ് നെറ്റ് സീറോ കാർബണ് എമിഷന് സ്ട്രാറ്റജി 2050 എന്നിവയ്ക്ക് കീഴില് 2050 ഓടെ മൊത്തം വൈദ്യുതി ശേഷിയുടെ 100 ശതമാനവും ശുദ്ധ ഊർജ്ജ സ്രോതസ്സുകളില് നിന്ന് ലഭ്യമാക്കാനാണ് ലക്ഷ്യമിടുന്നതെന്ന് വെറ്റെക്സിന്റെയും ദുബായ് സോളാർ ഷോയുടേയും സ്ഥാപകനും ചെയർമാനും ദേവ സിഇഒയുമായും മാനേജിംഗ് ഡയറക്ടറുമായ സയീദ് മുഹമ്മദ് അല് തായർ പറഞ്ഞു. 2011 നും 2021 നുമിടയില് വെറ്റെക്സ് സന്ദർശകരുടെ എണ്ണത്തിലും പതിന്മടങ്ങ് വർദ്ധനവുണ്ടായി. പുനരുപയോഗ ഊർജ്ജം അതോടൊപ്പം ശുദ്ധമായ ഊർജ്ജം എന്നിവയിലെല്ലാം പുതിയ സാധ്യതകള് തേടുകയാണ് ദുബായ്
വെറ്റെക്സില് അഭിമാനമായി ആസ ഗ്രൂപ്പ്, പുനരുപയുക്ത ഊർജ മേഖലയിൽ ബഹുരാഷ്ട്ര കമ്പനികളുമായി ധാരണ
വെറ്റെക്സില് അഭിമാനമായി മലയാളിയുടെ നേതൃത്വത്തിലുളള ആസാഗ്രൂപ്പ്. പുനരുപയുക്ത ഊർജ്ജമേഖലയില് ബഹുരാഷ്ട്ര കമ്പനികളുമായി ആസാ ഗ്രൂപ്പ് ധാരണയിലെത്തിയതായി ആസ ചെയർമാനും എം.ഡിയുമായ സി.പി. സാലിഹ് അറിയിച്ചു. ഒമാൻ ഗൾഫാർ എൻജിനീയറിംഗ് ആൻഡ് കോൺട്രാക്ടിംഗ്, യു.എസ് ജെ ടർബോ, യു.എ.ഇയിലെ ഇമാർ ഇൻഡസ്ട്രീസ് ആൻഡ് ഇൻവെസ്റ്റ്മെന്റ് എന്നിവയുമായി സംയുക്ത സംരംഭങ്ങൾ നടത്തും.. ഇമാറുമായി നേരത്തേതന്നെ കരാർ ഉണ്ട്. 2009 മുതൽ എല്ലാ വർഷവും തുടർച്ചയായി ആസായുടെ സാന്നിധ്യം വെറ്റെക്സിലുണ്ടെന്നും അദ്ദേഹം പറഞ്ഞു. അന്തർദേശീയ വ്യവസായ സംരംഭകരുമായി ആശയങ്ങൾ കൈമാറാനും പരസ്പര നേട്ടങ്ങൾക്കായി ഒരുമിച്ചു പ്രവർത്തിക്കാനും അനുഭവങ്ങളും അറിവുകളും നൂതന സാങ്കേതികവിദ്യകളും പരസ്പരം കൈമാറാനും കഴിയുന്നു. ആസയുടെ നേതൃത്വത്തിൽ സെമിനാറും നടന്നു. പവർ, ഇൻഫ്ര സ്ട്രക്ചർ, സിവിൽ, ഫെസിലിറ്റി മാനേജ്മെൻറ്, സ്ട്രക്ചറൽ സ്റ്റീൽ ഫാബ്രിക്കേഷൻ, ഐ.ടി, സോളാർ പവർ, ആർട്ടിഫിഷ്യൽ ഇൻറലിജൻസ്, കൺസ്ട്രക്ഷൻ എക്യുപ്മെന്റ് റെന്റൽ എന്നീ മേഖലകളിലാണ് ആസായുടെ പ്രവർത്തനം.
വിദഗ്ധസമിതി സെമിനാറുകളും ആസായുടെ നേതൃത്വത്തില് നടന്നു.കഴിഞ്ഞ 15വർഷങ്ങളായി ദുബായ് ഇലക്ട്രിസിറ്റി ആന്റ് വാട്ടർ അതോറിറ്റിയുമായി ചേർന്ന് പ്രവർത്തിക്കുന്നു. ദിവഎംഡിയും സി ഇ ഒ യും വെറ്റെക്സ് ചെയർമാനുമായ സയീദ് മുഹമ്മദ് അൽതായറിന്റെയും മറ്റു ഉന്നത അധികാരികളുടെയും പ്രശംസ പിടിച്ചുപറ്റാൻ ഈ കാലയളവിൽ ആസാക്കു കഴിഞ്ഞിട്ടുണ്ടെന്നും സിപി സാലിഹ് പറഞ്ഞു. ഡയറക്ടർ അൻഹർ സാലിഹ് ,സി ഇ ഒ ഫാരിസ് അബൂബക്കർ ,ജനറൽ മാനേജർ ഇബ്രാഹിംകുട്ടി എന്നിവർ സംബന്ധിച്ചു