അച്ഛനറിയാതെ മകന്റെ കല്യാണക്കാര്യം ബ്രോക്കറെ പറഞ്ഞേൽപ്പിച്ചു എന്നറിയുമ്പോൾ ഒരു ആണായിരുന്നിട്ടും വികാരം വ്രണപ്പെടുകയോ ആണത്തം സടകുടഞ്ഞെഴുന്നേൽക്കുകയോ ചെയ്യാത്ത ഒരു അച്ഛൻ! 😳

വീട്ടിലേക്കു കയറിവരുന്ന അമ്മ ബ്രോക്കർക്കു വെള്ളമൊന്നും കുടിക്കാൻ കൊടുത്തില്ലേ എന്നു ചോദിക്കുമ്പോൾ, അയ്യോ അതിനിപ്പോ ഇങ്ങോട്ടു വന്നുകയറിയതേ ഉള്ളൂ എന്നു പറഞ്ഞു വിനീതവിധേയനാവുന്ന അച്ഛൻ! 🤨

ജോലിയും കൂലിയുമില്ലാത്ത മൂത്തമകൻ പുരനിറഞ്ഞു നിൽക്കുമ്പോൾ, രണ്ടാമത്തെ മകൻ കല്യാണം കഴിക്കട്ടെ എന്നുള്ള അമ്മയുടെ തീരുമാനത്തിനു എതിർപ്പിന്റെ ഒരു ഞരക്കം പോലുമില്ലാതെ കീഴടങ്ങുന്ന അച്ഛൻ! ഒന്നുമല്ലെങ്കിലും പണിയൊന്നുമില്ലെങ്കിലും മൂത്തമകനും ഒരു ആണാണെന്നും അവനും ആണത്തമുണ്ടെന്നും ഓർക്കാത്ത ഒരു അച്ഛൻ!! 😐

ചേട്ടാ ഒരു അഞ്ഞൂറ് രൂപ തന്നേ എന്നു ബ്രോക്കർ പറയുമ്പോൾ, അകത്തു കയറിപ്പോയി സ്വന്തം പഴ്സ് എടുത്തുകൊണ്ടുവരാതെ, സാവിത്രീ എന്നുവിളിക്കുന്ന, വീട്ടിലെ ഫിനാൻസ് മിനിസ്റ്റർ ഭാര്യയാണെന്ന് നാട്ടുകാർ മനസിലാക്കുമെന്നുപോലും യാതൊരു ഉളുപ്പുമില്ലാത്ത ഒരു അച്ഛൻ! 😄

സാവിത്രീ, കട്ടൻ എന്നുവിളിച്ചു ചോദിക്കുമ്പോൾ കണ്ടുകൊണ്ടിരുന്ന എല്ലാ പുരുഷുക്കളുടെയും ഉള്ളിൽ ലഡു പൊട്ടിയിട്ടുണ്ടാവണം 😆 ഇരിക്കുന്നിടത്തു കട്ടൻ ആരവിടെ എന്നുചോദിച്ചു ഓടിയെത്തുമെന്നു കിനാവ് കണ്ടിരിക്കണം. ഇപ്പോൾ വേണ്ടാ, എന്നു സാവിത്രി പറയുമ്പോൾ, എന്നാൽ ഞാനൊരെണ്ണം ഇട്ടു കുടിക്കുവാ എന്നുകേട്ടപ്പോൾ തകർന്നുവീണത് എത്ര കട്ടൻ ഗ്ലാസുകളാണെന്നു അറിയാവോ? 😆

ഭാര്യ വീട്ടിൽ ഉണ്ടായിട്ടും ജോലി കഴിഞ്ഞു വീടണഞ്ഞിട്ടും നാളെ എന്താ കഴിക്കാൻ വേണ്ടതെന്നു മക്കളുടെ ഓർഡറും എടുത്തു അടുക്കളയിലേക്കു പായുന്ന യാതൊരു ചളിപ്പുമില്ലാത്ത ഒരച്ഛൻ! 😂 ഇയാളൊക്കെ ഒരു അച്ഛനാണോ!! 😂

കാപ്പിയുണ്ടാക്കി, ഗ്ലാസിൽ ഒഴിച്ച് ഭാര്യക്ക് ആദ്യം കൊടുത്തതിനു ശേഷം മാത്രം സ്വന്തം ഗ്ലാസിൽ തൊടുന്ന അച്ഛൻ! ഇങ്ങേരിത് ചളമാക്കും, മനുഷ്യനെ നാണം കെടുത്താനായിട്ട്! 🤣

ഒരു പണിയും ചെയ്യാതെ വീട്ടിൽ പട്ടിയെയും കളിപ്പിച്ചിരിക്കുന്ന മകനു വല്ല പണിക്കും പോയി മാതൃകയാവേണ്ടതിനു പകരം, ഉള്ള പണിയും കളഞ്ഞു വീട്ടിൽ അടുക്കളപ്പണി എടുക്കുകയാണെന്ന അഹങ്കാരം പോലുമില്ലാതെ, ആ പണിയിൽ അഭിമാനം കൊള്ളുന്ന ഒരച്ഛൻ! സ്വന്തം പണി കളഞ്ഞു ഭാര്യയെ പണിക്കും വിട്ടു പിള്ളേരെ നോക്കാൻ വീട്ടുപണിയും ചെയ്തിരിക്കുന്ന ഒരച്ഛൻ! ഇങ്ങേരൊക്കെ ഒരു അച്ഛനാണോ!! 🤣🤣

മകൻ പുറപ്പെട്ടു പോയി എന്നറിയുമ്പോൾ നെഞ്ചത്തടിച്ചു നിലവിളിക്കുന്ന അച്ഛൻ! ആണുങ്ങളുടെ മാനം കളയാനായിട്ട്! ഒരുതുള്ളി കണ്ണീരുവീഴാതെ കട്ടയ്ക്ക് കല്ലുപോലെ നിൽക്കണ്ടേ, നെഞ്ചത്തടിയും നിലവിളിയും ഒക്കെ ചെയ്യാൻ വീട്ടിൽ പെണ്ണുങ്ങളില്ലേ. ആൾക്കാരെ കൊണ്ട് പറയിപ്പിക്കാനായിട്ട്! ഒന്നുമല്ലെങ്കിലും ഇങ്ങളും ഒരു ആണല്ലേ മനുഷ്യാ! 😆

ഇത്തരം പ്രതിസന്ധി ഘട്ടങ്ങളിൽ വീട്ടിലെ പെണ്ണുങ്ങളെ താത്വികമായി പറഞ്ഞു സമാധാനിപ്പിച്ചു പുല്ലുപോലെ കാര്യങ്ങള് ഡീല് ചെയ്യണ്ട ഒരു ആൺപിറന്നോനാണ് ഇരുന്നു മോങ്ങുന്നത്! നിങ്ങള് ഇങ്ങനെ കരയാതെ മനുഷ്യാ എന്നു ഭാര്യയെക്കൊണ്ട് വരെ പറയിപ്പിച്ചു! എന്തൊരു കഷ്ടമാണെന്നു നോക്കണേ 😆

ഇന്നലെയും കൂടെ എന്റെ കുഞ്ഞു പുട്ടു വേണമെന്നു പറഞ്ഞതാ, എന്നിട്ട് ഞാൻ അപ്പമാണല്ലോ ഉണ്ടാക്കിയത്- ശെടാ, ഇനി അമ്മയുടെയും അച്ഛന്റെയും ഡയലോഗ്സ് അങ്ങോട്ടും ഇങ്ങോട്ടും മാറിപ്പോയതായിരിക്കുമോ? 😆

ബ്രോക്കർ വിളിക്കുമ്പോൾ നീ സംസാരിക്കെന്നു പറഞ്ഞു ഫോൺ ഭാര്യക്ക് കൊടുക്കുന്ന ഭർത്താവ്, സ്വന്തം അധികാരപരിധികളെ കുറിച്ചു യാതൊരു ബോധവുമില്ലാത്ത ഒരു മനുഷ്യൻ 😝

കാലാകാലങ്ങളായി നമ്മളെ ചിരിപ്പിച്ചു കൊണ്ടിരുന്ന അറുവഷളൻ അവസരങ്ങൾ ആവോളം ഉണ്ടായിരുന്നിട്ടും അതിലൊന്നും ചവിട്ടാതെ കരിക്ക് നമ്മളെ ചിരിപ്പിക്കുകയും ചിന്തിപ്പിക്കുകയും ചെയ്യുന്നു. പൊതുബോധങ്ങളിൽ അടിഞ്ഞു നാറിക്കിടക്കുന്ന ആണത്തങ്ങളുടെ ചെവിക്കു പിടിക്കുകയും നൈസായി അവരുടെ തൊലിയുരിയുകയും ചെയ്യുന്നു 🤭😁

ഇനിയിപ്പോ എല്ലാവർക്കും ഇച്ചിരെ ഓട്ട്സ് എടുക്കട്ടേ? 😄