വിനയ് ഫോര്ട്ട് നായകനായ തമാശ എന്ന സിനിമയിലെ സോംഗ് ടീസര് വന്നപ്പോള് രസംപിടിപ്പിച്ചത് ഷഹബാസ് അമന് പാട്ടിലെ വരികള് എടുത്ത് പറഞ്ഞ് സോംഗ് റെക്കോര്ഡിലേക്ക് കടക്കുന്നതായിരുന്നു. സംവിധായകനും തിരക്കഥാകൃത്തുമായ മുഹസിന് പരാരി എഴുതിയ തമാശയിലെ ആദ്യഗാനത്തിനായി പ്രേക്ഷകരും കാത്തിരിപ്പിലായിരുന്നു. ആ പാട്ടെത്തി. പാടി ഞാന് എന്ന് തുടങ്ങുന്ന പാട്ട് പാടിയിരിക്കുന്നത് സംഗീതമൊരുക്കിയതും ഷഹബാസ് അമന് ആണ്. സുഡാനി ഫ്രം നൈജിരിയ എന്ന സിനിമയ്ക്ക് ശേഷം ഹാപ്പി ഹവേഴ്സ് എന്റര്ടെയിന്മെന്റ് പ്രഖ്യാപിച്ച സിനിമയാണ് തമാശ. സമീര് താഹിറിനും ഷൈജു ഖാലിദിനും ഒപ്പം ലിജോ പെല്ലിശേരിയും ചെമ്പന് വിനോദ് ജോസും തമാശയില് നിര്മ്മാതാക്കളാണ്.
നവാഗതനായ അഷ്റഫ് ഹംസയാണ് തമാശയുടെ രചനയും സംവിധാനവും. സിനിമയുടെ ആദ്യലുക്കില് വിനയ് ഫോര്ട്ടിന്റെ കഥാപാത്രത്തെ അവതരിപ്പിച്ചപ്പോള് തന്നെ സിനിമ ചര്ച്ചയായിരുന്നു. ഈ പാട്ടിന്റെ പിന്നണിയിലുള്ളതും മുന്നിര സംഗീത സംവിധായകരാണ്.
റെക്സ് വിജയനും സുഷിന് ശ്യാമും മ്യൂസിക് പ്രൊഡക്ഷന്റെ ഭാഗമാണ്. സമീര് താഹിര് ക്യാമറ ചെയ്യുന്ന സിനിമയില് കോളേജ് അധ്യാപകന്റെ റോളിലാണ് വിനയ് ഫോര്ട്ട്. ദിവ്യ പ്രഭ, ചാന്ദ്നി എന്നിവരും ചിത്രത്തിലുണ്ട്.
പെരുന്നാള് റിലീസായി ചിത്രം സെന്ട്രല് പിക്ചേഴ്സാണ് വിതരണത്തിനെത്തിക്കുന്നത്.