ജഗദീഷ്, ഇന്ദ്രൻസ് തുടങ്ങിയവരെ പ്രധാന കഥാപാത്രങ്ങളാക്കി ഉത്സവ് രാജീവ്, ഫഹദ് നന്ദു എന്നിവർ തിരക്കഥയെഴുതി സംവിധാനം ചെയ്യുന്ന ചിത്രമാണ് പരിവാർ. പരിവാറിലെ വാർ എന്നത് കുടുംബത്തിലുള്ളവർ തമ്മിലുള്ള യുദ്ധത്തെയാണ് സൂചിപ്പിക്കുന്നതെന്ന് നടൻ ജ​ഗദീഷ്. ഫ്രാഗ്രന്റ് നേച്ചർ ഫിലിം ക്രിയേഷൻസിന്റെ ബാനറിൽ ആൻ സജീവ്, സജീവ് പി കെ എന്നിവരാണ് പരിവാർ നിർമിക്കുന്നത്. ഒരു കുടുംബത്തിൽ നടക്കുന്ന ട്രാജഡിയും അതേ തുടർന്നുണ്ടാകുന്ന പ്രശ്നങ്ങളും ശുദ്ധഹാസ്യത്തിൽ അവതരിപ്പിക്കുന്ന ചിത്രമാണ് പരിവാർ. ചിത്രം പറയുന്നത് ഒരു ക്ലീഷേ വിഷയമല്ലെന്നും പല തരത്തിലുള്ള ആൾക്കാരുടെ ജീവിതമാണ് ഈ സിനിമ എന്നും ജ​ഗദീഷ് പറഞ്ഞു.

ജ​ഗദീഷ് പറഞ്ഞത്:

സിനിമയുടെ ടൈറ്റിൽ ആയ പരിവാറിലെ വാർ എന്നത് യുദ്ധം തന്നെയാണ് ഉദ്ദേശിക്കുന്നത്. ഈ കുടുംബത്തിലെ അം​​ഗങ്ങൾ തമ്മിലുള്ള സ്പർധയും മത്സരവുമെല്ലാം ഈ സിനിമയിൽ വരുന്നുണ്ട്. സാധാരണ​ ​ഗതിയിൽ കുടുംബത്തിലുള്ളവർ തമ്മിൽ‌ വഴക്കുണ്ടാകുന്നത് സ്വത്തിന് വേണ്ടിയാവും, അല്ലെങ്കിൽ ഭാര്യമാർ തമ്മിലുള്ള പ്രശ്നത്തിൽ ഭർത്താക്കന്മാർ ഇടപെടുമ്പോഴുണ്ടാകുന്ന പ്രശ്നം, അമ്മായിയമ്മപ്പോര് എന്നാൽ ഈ സിനിമയിൽ അത്തരത്തിലുള്ള ക്ലീഷെ വിഷയമല്ല പറയുന്നത്. എന്നാൽ മനുഷ്യന്റെ പണത്തിനോടുള്ള ആർത്തി ഈ സിനിമയിലെ ഒരു പ്രധാനപ്പെട്ട വിഷയമാണ്. അതിൽ പണത്തിനോട് ആർത്തിയുള്ളവരും ഇല്ലാത്തവരും കുടുംബത്തിന് മൂല്യം കൊടുക്കുന്നവരും എല്ലാം ഉണ്ട്. അങ്ങനെയുള്ള പലതരത്തിലുള്ള ആൾക്കാരുടെ ജീവിതമാണ് ഈ സിനിമ പറയുന്നത്.

ജഗദീഷ്, ഇന്ദ്രൻസ് തുടങ്ങിയവരെക്കൂടാതെ പ്രശാന്ത് അലക്സാണ്ടർ, മീനരാജ്, ഭാഗ്യ, ഋഷികേശ്, സോഹൻ സീനുലാൽ, പ്രമോദ് വെളിയനാട്, ഉണ്ണി നായർ, ഷാബു പ്രൗദീൻ, ആൽവിൻ മുകുന്ദ്, വൈഷ്ണവ്, അശ്വന്ത് ലാൽ, ഹിൽഡ സാജു, ഉണ്ണിമായ നാലപ്പാടം, ഷൈനി വിജയൻ, ശോഭന വെട്ടിയാർ എന്നിവരാണ് ചിത്രത്തിലെ മറ്റു പ്രധാന കഥാപാത്രങ്ങളെ അവതരിപ്പിക്കുന്നത്. ഒരു മുഴുനീള കോമഡി ചിത്രമായാണ് പരിവാർ ഒരുങ്ങുന്നത്. ചിത്രത്തിന്റെ ഛായാഗ്രഹണം നിർവഹിക്കുന്നത് അൽഫാസ് ജഹാംഗീർ ആണ്. പ്രണയം, ഖൽബ്, ഗോളം, യുണൈറ്റഡ് കിംഗ്ഡം ഓഫ് കേരള, കിണർ, കേണി (തമിഴ് ) തുടങ്ങി ഏഴോളം സിനിമകൾ നിർമിച്ച സൗത്ത് ഇന്ത്യയിലെ പ്രമുഖ സിനിമ നിർമാണ കമ്പനിയാണ് ഫ്രാഗ്രന്റ് നേച്ചർ ഫിലിം ക്രിയേഷൻസ്. സന്തോഷ് വർമ്മ എഴുതിയ വരികൾക്ക് ബിജിബാൽ ആണ് സംഗീതസംവിധാനം നിർവഹിക്കുന്നത്. ചിത്രം മാർച്ച് 7 ന് തിയറ്ററുകളിലെത്തും.

പ്രൊഡക്ഷൻ കൺട്രോളർ-സതീഷ് കാവിൽ കോട്ട, കല-ഷിജി പട്ടണം, വസ്ത്രലങ്കാരം-സൂര്യ രാജേശ്വരീ, മേക്കപ്പ്-പട്ടണം ഷാ, എഡിറ്റർ-വിഎസ് വിശാൽ, ആക്ഷൻ-മാഫിയ ശശി, സൗണ്ട് ഡിസൈൻ-എം ആർ കരുൺ പ്രസാദ്, ചീഫ് അസോസിയേറ്റ് ഡയറക്ടർ-കെ ജി രജേഷ് കുമാർ, അസോസിയേറ്റ് ഡയറക്ടർ-സുമേഷ് കുമാർ, കാർത്തിക്, അസിസ്റ്റൻ്റ് ഡയറക്ടർ-ആന്റോ,പ്രാഗ് സി,സ്റ്റിൽസ്-രാംദാസ് മാത്തൂർ, വിഎഫ്എക്സ്-പ്രോമൈസ് ഗോകുൽവിശ്വം, പ്രൊഡക്ഷൻ എക്സിക്യൂട്ടീവ്-ശിവൻ പൂജപ്പുര. "പരിവാർ" എന്ന കുടുംബ -ഹാസ്യ -പ്രണയ ചിത്രം മാർച്ച് ഏഴിന് പ്രദർശനത്തിനെത്തും.പി ആർ ഒ -എ എസ് ദിനേശ്,വാഴൂർ ജോസ്, അരുൺ പൂക്കാടൻ. അഡ്വടൈസ്‌മെന്റ് -ബ്രിങ് ഫോർത്ത്.