മമ്മൂട്ടിയും മഞ്ജുവാര്യരും ഒന്നിക്കുന്ന ചിത്രം പ്രീസ്റ്റിന്റെ പോസ്റ്റര്‍ കോപ്പിയടിച്ചതെന്ന പ്രചരണത്തിന് മറുപടിയുമായി ഓള്‍ഡ്‌മോങ്ക്‌സ്. കഴിഞ്ഞ ദിവസം പുറത്തുവന്ന പ്രീസ്റ്റിന്റെ പോസ്റ്റര്‍ ആവേശത്തോടെയായിരുന്നു ആരാധകര്‍ ഏറ്റെടുത്തത്. വ്യത്യസ്തത നിറഞ്ഞ മമ്മൂട്ടിയുടെ ലുക്ക് ആയിരുന്നു പോസ്റ്ററിന്റെ ആകര്‍ഷണം.

ഇതിന് പിന്നാലെയാണ് 'പ്രീസ്റ്റി'ന്റേതിന്' സമാനമായി അമേരിക്കന്‍ ടെലിവിഷന്‍ സീരീസായ ബ്രേക്കിങ് ബാഡിന്റെ എഡിറ്റ് ചെയ്ത പോസ്റ്റര്‍ സമൂഹമാധ്യമത്തില്‍ പ്രത്യക്ഷപ്പെട്ടത്. ഇതോടെ ഇതിലേതാണ് ഒറിജിനല്‍ എന്ന ചര്‍ച്ചയും സജീവമായി.

പോസ്റ്റര്‍ കോപ്പിയടിയാണോ എന്ന ചര്‍ച്ചകള്‍ക്ക് തെളിവടക്കം മറുപടിയുമായാണ് പ്രീസ്റ്റിന്റെ പോസ്റ്റര്‍ തയ്യാറാക്കിയ ഓള്‍ഡ് മോങ്ക്‌സ് രംഗത്തെത്തിയത്. ഒറിജിനല്‍ പോസ്റ്ററും, ലൊക്കേഷന്‍ സ്റ്റില്ലും, വ്യാജപ്രചരണത്തിന് ഉപയോഗിക്കുന്ന പോസ്റ്ററും പങ്കുവെച്ച് ഓള്‍ഡ്‌മോങ്ക്‌സ് കുറിച്ചതിങ്ങനെ, 'ആദ്യത്തേത് ലൊക്കേഷന്‍ സ്റ്റില്‍. രണ്ടാമത്തേത് ഓള്‍ഡ്‌മോങ്ക്‌സ് പ്രീസ്റ്റിനു വേണ്ടി ചെയ്ത പോസ്റ്റര്‍. മൂന്നാമത്തേത് ഞങ്ങളെക്കാള്‍ കഷ്ടപ്പെട്ട് മറ്റാരോ ചെയ്ത തലവെട്ടി പോസ്റ്റര്‍. കഥ തിരിച്ചാണ് പ്രചരിപ്പിക്കപ്പെടുന്നത് എന്ന് പറയേണ്ടതില്ലല്ലോ. അപരന്മാര്‍ക്ക് പ്രണാമം.'

ക്യു’ ഇപ്പോള്‍ ടെലഗ്രാമിലും ലഭ്യമാണ്. കൂടുതല്‍ വാര്‍ത്തകള്‍ക്കും അപ്‌ഡേറ്റുകള്‍ക്കുമായി ടെലഗ്രാം ചാനല്‍ സബ്‌സ്‌ക്രൈബ് ചെയ്യാം

നവാഗതനായ ജോഫിന്‍ ടി ചാക്കോ കഥയെഴുതി സംവിധാനം ചെയ്യുന്ന ചിത്രം ദ പ്രീസ്റ്റ് ആരാധകര്‍ ഏറെ ആകാംക്ഷയോടെ കാത്തിരിക്കുന്ന ചിത്രങ്ങളില്‍ ഒന്നാണ്. മമ്മൂട്ടിക്കും മഞ്ജു വാര്യര്‍ക്കും ഒപ്പം വലിയ താര നിരയാണ് ചിത്രത്തില്‍ ഒന്നിക്കുന്നത്. ആന്റോ ജോസഫും ബി ഉണ്ണിക്കൃഷ്ണനും ചേര്‍ന്നാണ് നിര്‍മ്മിക്കുന്നത്. ശ്യാം മേനോനും ദീപു പ്രദീപുമാണ് തിരക്കഥ. രാഹുല്‍ രാജ് സംഗീത സംവിധാനം.

ദ ക്യു പ്രോഗ്രാമുകള്‍ക്കും വീഡിയോകള്‍ക്കുമായി ഞങ്ങളുടെ യൂട്യൂബ് ചാനല്‍ ഈ ലിങ്കില്‍ സബ്‌സ്‌ക്രൈബ് ചെയ്യാം

Oldmonks About The Priest Movie Poster