എമ്പുരാൻ 2024 അവസാനമോ 2025 ജനുവരിയിലോ റിലീസിനെത്തുമെന്ന് സ്ഥിതീകരിച്ച് നടൻ മോഹൻലാൽ. മലയാളത്തിലെ ഇൻഡസ്ട്രി ഹിറ്റുകളിലൊന്നായ ലൂസിഫർ എന്ന സിനിമയുടെ രണ്ടാം ഭാ​ഗമായി ഒരുങ്ങുന്ന ചിത്രമാണ് എമ്പുരാൻ. സ്വന്തമായി ജെറ്റ് വിമാനവും കൊട്ടാരങ്ങളുമുള്ള ഒരു കോടീശ്വരന്റെ വേഷമാണ് ഇനി ചെയ്യാനുള്ളതെന്നാണ് എമ്പുരാനിലെ അബ്രഹാം ഖുറേഷി എന്ന കഥാപാത്രത്തെക്കുറിച്ച് മുമ്പ് മോ​ഹൻലാൽ പറഞ്ഞത്. ഇപ്പോൾ ഏഷ്യാനെറ്റിൽ സംപ്രേക്ഷണം ചെയ്യുന്ന ബി​ഗ്ബോസ്സ് എന്ന ടെലിവിഷൻ പരിപാടിയിൽ എമ്പുരാൻ ഈ വർഷമോ അടുത്ത വർഷം ജനുവരിയിലോ റിലീസിനെത്തുമെന്ന് സ്ഥിതീകരിച്ചിരിക്കുകയാണ് മോഹൻലാൽ.

മോഹൻലാൽ പറഞ്ഞത്:

എമ്പുരാന്റെ ഷൂട്ടിം​ഗ് നടക്കുകയാണ്. ലേ ലഡാക്ക് എന്ന സ്ഥലത്താണ് ചിത്രത്തിന്റെ ഷൂട്ടിം​ഗ് ആരംഭിച്ചത്. അത് കഴിഞ്ഞ് യു.കെയിലും യുഎസ്എയിലും പിന്നീട് മദ്രാസിലും ഷൂട്ട് ചെയ്തു. ഇപ്പോൾ തിരുവന്തപുരത്ത് ചിത്രീകരണം നടന്നുകൊണ്ടിരിക്കുകയാണ്. ഇനി കുറച്ചു കാലം ​ഗുജറാത്തിലും ദുബായിലും ഷൂട്ട് ചെയ്യാനുണ്ട്. എന്താണ് ഖുറേഷി അബ്രാം എന്ന് നിങ്ങൾ മനസ്സിലാക്കും ആ സിനിമയിലൂടെ. സിനിമ ഈ വർഷം റിലീസ് ചെയ്യാനാണ് ഞങ്ങൾ ശ്രമിക്കുന്നത്. അല്ലെങ്കിൽ അടുത്ത വർഷം ജനുവരിയിൽ.

100 കോടിക്ക് മുകളിൽ ബജറ്റിലാണ് എൽ ടു എന്ന ലൂസിഫർ രണ്ടാം ഭാ​ഗമൊരുങ്ങുന്നത്. മുരളി ​ഗോപിയാണ് തിരക്കഥ. ആശിർവാദ് സിനിമാസും ലൈക പ്രൊഡക്ഷൻസും ചേർന്നാണ് നിർമ്മാണം. കേരള രാഷ്ട്രീയത്തിൽ നിർണായക സ്വാധീനമുള്ള സ്റ്റീഫൻ നെടുമ്പള്ളി അബ്രാം ഖുറേഷിയെന്ന ആയുധ വ്യാപാരി കൂടിയായ അധോലോക നായകനാണെന്ന് സൂചന നൽകിയാണ് ലൂസിഫർ അവസാനിച്ചത്. ഇതിന്റെ കഥാതുടർച്ചയാണ് എമ്പുരാൻ.