കമല്‍ഹാസന്‍ നായകനാകുന്ന ശങ്കര്‍ ചിത്രം ഇന്ത്യന്‍2 വിന്റെ സെറ്റില്‍ ക്രെയിന്‍ തകര്‍ന്നുവീണ അപകടത്തില്‍ മൂന്ന് പേരാണ് മരിച്ചത്. സഹസംവിധായകന്‍ കൃഷ്ണ, ആര്‍ട് അസിസ്റ്റന്റ് ചന്ദ്രന്‍, പ്രൊഡക്ഷന്‍ അസിസ്റ്റന്റ് മധു എന്നിവരാണ് മരിച്ചത്. ഇവരെക്കൂടാതെ ഒന്‍പത് പേര്‍ക്ക് ഗുരുതരമായി പരുക്കേറ്റു. സംവിധായകന്‍ ശങ്കറിനും പരുക്കേറ്റുവെന്നാണ് റിപ്പോര്‍ട്ടുകള്‍. തന്റെ അഭിനയ ജീവിതത്തില്‍ ഒരുപാട് അപകടങ്ങള്‍ ഉണ്ടായിട്ടുണ്ടെങ്കിലും ഏറ്റവും ഭയാനകമായ സംഭവമാണ് ഇന്നലെയുണ്ടായതെന്ന് കമല്‍ പറഞ്ഞു.
മൂന്ന് സഹപ്രവര്‍ത്തകരെയാണ് എനിക്ക് നഷ്ടപ്പെട്ടത്. പക്ഷേ അവരുടെ കുടുംബത്തിന്റെയും പ്രിയപ്പെട്ടവരുടെയും വേദന താങ്ങാനാകാത്തതാണ്.അവരില്‍ ഒരാളായി അവരുടെ വേദനയില്‍ പങ്കു ചേരുന്നുകമല്ഹാസന്
എന്താണ് ഞങ്ങള്‍ അനുഭവിക്കുന്നതെന്ന് വാക്കുകള്‍ക്ക് പറയാന്‍ കഴിയില്ലെന്നും കഠിനാധ്വാനികളായ മൂന്ന് ടെക്‌നിഷ്യന്‍സിനെയാണ് നഷ്ടപ്പെട്ടതെന്നും ചിത്രത്തിന്റെ നിര്‍മാതാക്കളായ ലൈക്ക പ്രൊഡക്ഷന്‍സും കുറിച്ചു. പൂനെ ഇവിപി ഫിലിം സിറ്റിയിലെ ലൊക്കേഷനിലാണ് അപകടമുണ്ടായത്. പാട്ടു സീന്‍ ചിത്രീകരിക്കാനുള്ള മുന്നോടിയായി സെറ്റ് ഇടുന്ന ജോലികള്‍ നടക്കുകയായിരുന്നു. ഇതിനിടെ 150 അടിയിലേറെ ഉയരമുള്ള ക്രെയിന്‍ സംവിധായകനും സംഘവും ഇരുന്ന ടെന്റിന് മുകളിലേക്ക് മറിയുകയായിരുന്നുവെന്നാണ് റിപ്പോര്‍ട്ടുകള്‍.
മുന്‍പ് ഇതേ ലൊക്കേഷനില്‍ വിജയ് സിനിമ ബിഗിലിന്റെ ചിത്രീകരണത്തിനിടെയും അപകടമുണ്ടായിരുന്നു.
‘ദ ക്യു’ ഇപ്പോള്‍ ടെലഗ്രാമിലും ലഭ്യമാണ്. കൂടുതല്‍ വാര്‍ത്തകള്‍ക്കും അപ്‌ഡേറ്റുകള്‍ക്കുമായി ടെലഗ്രാം ചാനല്‍ സബ്‌സ്‌ക്രൈബ് ചെയ്യാം