കീർത്തിചക്ര എന്ന സിനിമയുടെ ഓർമ്മകൾ പങ്കുവെച്ച് നടൻ ജീവ. സിനിമയുടെ അവസാന ഭാഗങ്ങൾ കേരളത്തിലാണ് ചിത്രീകരിച്ചത്. ആ രംഗങ്ങൾ ഒറ്റ ടേക്കിൽ പൂർത്തിയാക്കാൻ സാധിച്ചുവെന്നും, അതിന് ശേഷം മോഹൻലാൽ തന്നെ അഭിനന്ദിച്ചുവെന്നും നടൻ പറഞ്ഞു. ക്യു സ്റ്റുഡിയോയ്ക്ക് നൽകിയ അഭിമുഖത്തിൽ സംസാരിക്കുകയായിരുന്നു ജീവ.
ജീവയുടെ വാക്കുകൾ:
കീർത്തിചക്രയുടെ അവസാന രംഗങ്ങളിൽ എന്റെ കഥാപാത്രം മരണപ്പെടും. ആ രംഗങ്ങൾ കാരണമാണ് ചിത്രം ചെയ്യാൻ ഞാൻ തീരുമാനിച്ചത്. ഈ കഥ കേൾക്കുമ്പോൾ ഞാൻ കരഞ്ഞുപോയി. ഈ കഥയും കഥാപാത്രവും നല്ല രീതിയിൽ അവതരിപ്പിക്കാനാകുമെന്ന് മേജർ രവി സാറിനും ഒരു വിശ്വാസം ഉണ്ടായി. ആ രംഗങ്ങൾ പാലക്കാടാണ് ചിത്രീകരിച്ചത്.
ഒറ്റ ടേക്കിലാണ് ക്ലൈമാക്സ് ഞാൻ ചെയ്തത്. ലാലേട്ടൻ എന്നെ അഭിനന്ദിക്കുകയും ചെയ്തു. "ഇതുവരെയുള്ള രംഗങ്ങൾ നല്ല രീതിയിൽ ചെയ്തോ ഇല്ലയോ എന്ന് അറിയില്ല, എന്നാൽ ഈ രംഗം ഗംഭീരമാക്കി" എന്ന് അദ്ദേഹം പറഞ്ഞു. സിനിമ റിലീസ് ചെയ്ത ശേഷം അദ്ദേഹം എന്നെ വിളിച്ച്, "ജീവ, നിങ്ങൾക്ക് നല്ല പ്രശംസ ലഭിക്കുന്നുണ്ട്" എന്ന് പറഞ്ഞു.
ഈ വേളയിൽ ലാലേട്ടനോട് ഞാൻ നന്ദി പറയാൻ ആഗ്രഹിക്കുന്നു. മറ്റൊരു സൂപ്പർതാരവും സഹതാരത്തിന് ഇത്രത്തോളം പെർഫോം ചെയ്യാനുള്ള സ്പേസ് നൽകില്ല. മറ്റാരായാലും അങ്ങനെ ചെയ്യില്ല. സിനിമ കണ്ട് പുറത്തിറങ്ങുമ്പോൾ ജയ് എന്ന കഥാപാത്രം എല്ലാവരുടെയും മനസ്സിൽ നിൽക്കും.