കേരളത്തിലെ ജനകീയ കായിക വിനോദമായ വടംവലി പ്രമേയമാക്കി ഒരുങ്ങുന്ന ‘ആഹാ’ എന്ന ചിത്രത്തിന്റെ ഫസ്റ്റ് ലുക്ക് പോസ്റ്റര്‍ പുറത്തിറക്കി. ചിത്രത്തിലെ നായകനായ ഇന്ദ്രജിത്തിന്റെ ജന്മദിനം പ്രമാണിച്ചാണ് ഫസ്റ്റ് ലുക്ക് പുറത്തിറക്കിയിരിക്കുന്നത്. നവാഗതനായ ബിബിന്‍ പോളാണ് ചിത്രം സംവിധാനം ചെയ്യുന്നത്.
2008- ലെ വടംവലി സീസണില്‍ എഴുപത്തി മൂന്നു മത്സരങ്ങളില്‍ എഴുപത്തി രണ്ടിലും ചാമ്പ്യന്‍ പട്ടം കരസ്ഥമാക്കിയ ആഹാ നീലൂര്‍ എന്ന വടംവലി ടീമിന്റെ വിജയകഥയില്‍ നിന്ന് പ്രചോദനം ഉള്‍ക്കൊണ്ടാണ് എഡിറ്റര്‍ കൂടിയായ ബിബിന്‍ പോള്‍ സാമുവേല്‍ സംവിധാനം ചെയ്യുന്ന സിനിമ. ഇന്ദ്രജിത്തിനൊപ്പം അമിത് ചക്കാലക്കല്‍, മനോജ് കെ ജയന്‍ അശ്വിന്‍ കുമാര്‍ തുടങ്ങിയവര്‍ മറ്റ് പ്രധാനവേഷങ്ങളിലെത്തുന്നു. ശാന്തി ബാലചന്ദ്രനാണ് നായിക. ചിത്രത്തിന്റെ ഷൂട്ടിങ്ങ് അവസാനഘട്ടത്തിലാണ്.
സാസാ പ്രൊഡക്ഷന്‍സിന്റെ ബാനറില്‍ പ്രേം അബ്രഹാം സിനിമ നിര്‍മ്മിക്കുന്നു. വടംവലിയ്ക്ക് പ്രാധാന്യമുള്ള ഈ ചിത്രത്തിനായി പ്രത്യേക മേക്ക് ഓവറില്‍ ആണ് ഇന്ദ്രജിത്ത് എത്തുന്നത്. ടോബിട് ചിറയത്ത് തിരക്കഥ എഴുതുന്ന 'ആഹാ'യുടെ ഛായാഗ്രഹണം നിര്‍വഹിക്കുന്നത് പോളിഷ് സിനിമാട്ടോഗ്രാഫര്‍ ആര്‍തര്‍ സ്വാര്‍സ്‌ക്കിയുടെ അസോസിയേറ്റ് ആയ രാഹുല്‍ ബാലചന്ദ്രനാണ്. ഗായിക സയനോരാ ഫിലിപ്പാണ് സംഗീത സംവിധാനം നിര്‍വഹിക്കുന്നത്. അടുത്ത വര്‍ഷം വേനലവധിക്ക് ചിത്രം റിലീസ് ചെയ്യും.