മലയാള സിനിമാ എഡിറ്റർ നിഷാദ് യൂസഫ് അന്തരിച്ചു. കൊച്ചിയിലെ പനമ്പള്ളി നഗറിലെ ഫ്ലാറ്റിൽ മരിച്ച നിലയിൽ നിഷാദിനെ കണ്ടെത്തുകയായിരുന്നു. മലയാളം, തമിഴ് സിനിമകളുടെ എഡിറ്ററായി പ്രവർത്തിച്ചിട്ടുണ്ട്. ഹരിപ്പാട് സ്വദേശിയാണ്. 2022 ൽ തല്ലുമാല സിനിമയുടെ എഡിറ്റിങ്ങിന് മികച്ച എഡിറ്റർക്കുള്ള സംസ്ഥാന പുരസ്കാരം ലഭിച്ചിട്ടുണ്ട്.
തന്റേതായ ശൈലിയിൽ എഡിറ്റിങ്ങിന് പുതിയ ഭാവുകത്വം നൽകിയ എഡിറ്ററാണ് നിഷാദ് യൂസഫ്. ഉണ്ട, ഓപ്പറേഷൻ ജാവ, തല്ലുമാല, സൗദി വെള്ളക്ക, ചാവേർ, ആയിരത്തൊന്നു നുണകൾ, ആളങ്കം, രാമചന്ദ്ര ബോസ് & കൊ, ഉടൽ, അഡിയോസ് അമിഗോ എന്നിവയാണ് നിഷാദ് യൂസഫ് എഡിറ്റിങ് നിർവഹിച്ച ചിത്രങ്ങൾ. പുതിയ മലയാള സിനിമയിലെ നിർണ്ണായകമായ സാന്നിധ്യമായിരുന്നു.
മമ്മൂട്ടിയുടെ ബസൂക്ക, സൂര്യയുടെ കങ്കുവാ, നസ്ലെൻ നായകനാകുന്ന ആലപ്പുഴ ജിംഖാന, തരൂർ മൂർത്തി സംവിധാനം ചെയ്യുന്ന മോഹൻലാൽ ചിത്രം എന്നിവയുടെ എഡിറ്റർ നിഷാദ് യൂസഫായിരുന്നു. എഡിറ്ററുടെ അപ്രതീക്ഷിത വിയോഗത്തിന്റെ ഞെട്ടലിലാണ് മലയാള സിനിമാ ലോകം.