യുവ താരം ദുൽഖർ സൽമാന്റെ വാഹന കമ്പം പ്രശസ്തമാണ്. എന്നാൽ ദുൽഖറും അദ്ദേഹത്തിന്റെ വാഹനവും അടങ്ങുന്ന വീഡിയോ സോഷ്യൽ മീഡിയയിൽ വൈറൽ ആയിരിക്കുകയാണ്. കാരണം ട്രാഫിക് നിയമ ലംഘനവും.

ദുൽഖറിന്റെ പുതിയ പോർഷെ പനമേര കാർ ആലപ്പുഴ ബൈപ്പാസിന് സമീപം വൺവേ തെറ്റിച്ചു വരുന്നതാണ് വീഡിയോ. തുടർന്ന് വാഹനം ട്രാഫിക്ക് പൊലീസ് തടയുന്നതും റിവേഴ്‌സ് എടുത്ത് പോകാൻ ആവശ്യപ്പെടുന്നതും വീഡിയോയിൽ കാണാം. ഉടൻ തന്നെ കാർ റിവേഴ്‌സ് എടുത്ത് ശരിയായ ട്രാക്കിലൂടെ പോകുന്നുമുണ്ട്. ഇൻസ്റ്റഗ്രാമിൽ മുഹമ്മദ് ജസീൽ എന്ന വ്യക്തിയാണ് വീഡിയോ പങ്കുവെച്ചിരിക്കുന്നത്. പോർഷെ കാറിന് പിന്നാലെ വരുന്ന യുവാക്കൾ കുഞ്ഞിക്ക എന്ന് വിളിക്കുന്നതും കേൾക്കാം.

2018 ലാണ്​ ദുൽഖർ സൽമാൻ പോർഷെ പനമേര വാങ്ങുന്നത്​. നാലുപേർക്ക്​ സഞ്ചരിക്കാവുന്ന അപൂർവ്വം സ്​പോർട്​സ്​ കാറുകളിലൊന്നാണ്​ പോർഷെ പനമേര. വാങ്ങിയ സമയത്ത്​ വാഹനത്തിന്‍റെ ചിത്രങ്ങളും വീഡിയോകളും ഇന്‍റർനെറ്റിൽ വൈറലായിരുന്നു.