മമ്മൂട്ടിയെ കേന്ദ്ര കഥാപാത്രമാക്കി ബി ഉണ്ണികൃഷ്ണന് സംവിധാനം ചെയ്യുന്ന ക്രിസ്റ്റഫറിന്റെ രണ്ടാമത്തെ ടീസര് പുറത്തിറങ്ങി. ഫെബ്രുവരി 9ന് റിലീസ് ചെയ്യുന്ന ചിത്രത്തിന്റെ തിരക്കഥ ഉദയ കൃഷ്ണയാണ്. ആറാട്ടിന് ശേഷം ഉദയ കൃഷ്ണ-ബി ഉണ്ണികൃഷ്ണന് കൂട്ടുകെട്ടില് ഒരുങ്ങുന്ന ചിത്രം കൂടിയാണിത്.
സ്നേഹ, അമലപോള്, ഐശ്വര്യ ലക്ഷ്മി എന്നിവര് നായികമാരാവുന്ന ചിത്രത്തില് സുപ്രധാന വേഷത്തില് തെന്നിന്ത്യന് താരം വിനയ് റായും എത്തുന്നുണ്ട്. വിനയ് റായ് ആദ്യമായി മലയാളത്തില് അഭിനയിക്കുന്ന ചിത്രം കൂടിയാണിത്. അതോടൊപ്പം ഷൈന് ടോം ചാക്കോ, ദിലീഷ് പോത്തന്, സിദ്ദീഖ്, ജിനു എബ്രഹാം, വിനീത കോശി, വാസന്തി തുടങ്ങി നിരവധി താരങ്ങളോടൊപ്പം മുപ്പത്തിയഞ്ചോളം പുതുമുഖങ്ങളും ചിത്രത്തിലുണ്ട്.
ഫൈസ് സിദ്ദിക്കാണ് ചിത്രത്തിന്റെ ഛായാഗ്രഹണം നിര്വ്വഹിക്കുന്നത്. സുപ്രീം സുന്ദറാണ് ചിത്രത്തിന്റെ ആക്ഷന് രംഗങ്ങള് ഒരുക്കുന്നത്. തല്ലുമാലയില് ഉപയോഗിച്ചിരിക്കുന്ന മോക്കോ ബോട്ട് ക്യാമറ ചിത്രത്തിലെ സംഘട്ടനത്തില് ഉപയോഗിക്കുന്നുണ്ടെന്ന് സുപ്രീം സുന്ദര് ദ ക്യു സ്റ്റുഡിയോയ്ക്ക് നല്കിയ അഭിമുഖത്തില് പറഞ്ഞിരുന്നു.
സംഗീതം: ജസ്റ്റിന് വര്ഗീസ്, എഡിറ്റിംഗ്: മനോജ്, പ്രൊഡക്ഷന് കണ്ട്രോളര്: അരോമ മോഹന്, കലാ സംവിധാനം: ഷാജി നടുവില്, വസ്ത്രാലങ്കാരം: പ്രവീണ് വര്മ്മ, ചമയം: ജിതേഷ് പൊയ്യ, ആക്ഷന്: സുപ്രീം സുന്ദര്, ചീഫ് അസോസിയേറ്റ്: സുജിത്ത് സുരേഷ്, പി.ആര്.ഒ: പി.ശിവപ്രസാദ് & നിയാസ് നൗഷാദ്, മാര്ക്കറ്റിംങ്: ഒബ്സ്ക്യൂറ എന്റര്ടൈന്മെന്റ്സ്, സ്റ്റില്സ്: നവീന് മുരളി, ഡിസൈന്: കോളിന്സ് ലിയോഫില് എന്നിവരാണ് മറ്റ് അണിയറ പ്രവര്ത്തകര്.