ജീത്തു ജോസഫ് ത്രില്ലർ സിനിമകൾക്ക് പ്രേക്ഷകർക്കിടയിൽ വലിയ സ്വാധീനം ഉണ്ട്. ആ സിനിമകളോട് കിടപിടിക്കുന്ന വളരെ മികച്ച ഒരു ത്രില്ലർ അനുഭവം തിയേറ്ററിൽ സമ്മാനിക്കുന്ന ചിത്രമാണ് ദൃഢം. ആദ്യ ഷോയ്ക്ക് ഒടുവിൽ മികച്ച പ്രേക്ഷക പ്രതികരണങ്ങളാണ് ചിത്രത്തിന് ലഭിച്ചുകൊണ്ടിരിക്കുന്നത്.

മാർട്ടിൻ ജോസഫ് സംവിധാനം ചെയ്ത ചിത്രത്തിന്റെ തിരക്കഥ ഒരുക്കിയിരിക്കുന്നത് ജോമോൻ ജോൺ - ലിന്റോ ദേവസ്യ കൂട്ടുകെട്ടാണ്. ഇടുക്കിയിലെ ഏകാന്തമായ ഒരു പോലീസ് സ്റ്റേഷനിലേക്ക് ആദ്യ പോസ്റ്റിങ്ങായി എത്തുന്ന ചെറുപ്പക്കാരനായ എസ്.ഐ വിജയ് രാധാകൃഷ്ണനാണ് കഥയിലെ നായകൻ.

വളരെ ശാന്തമായി കിടക്കുന്ന സ്റ്റേഷനിൽ വിജയ്‌യുടെ വരവോടെ കാര്യങ്ങൾ മാറിമറിയുന്നു. ഒരു കൊലപാതകവും ഒരു ധനകാര്യ സ്ഥാപനത്തിലെ മോഷണവും ഉൾപ്പെടെ ഗുരുതര സംഭവങ്ങൾ ഒന്നിന് പുറകെ ഒന്നായി വന്നുചേരുന്നു. ഒരു തുടക്കക്കാരൻ ഉദ്യോഗസ്ഥന് മുന്നിൽ വെച്ച ഈ വെല്ലുവിളികളെ അദ്ദേഹം എങ്ങനെ നേരിടുന്നു, എത്രത്തോളം കഠിനാധ്വാനവും മാനസിക സമ്മർദ്ദവും താങ്ങിനിന്ന് മുന്നോട്ടുപോകുന്നു എന്നതാണ് ചിത്രം മുഖ്യമായും പറയുന്നത്.

സാധാരണ കുറ്റാന്വേഷണ സിനിമകളിലെ ക്ലീഷേകളിൽ നിന്ന് ദൃഢം ഒരുപാട് വ്യത്യസ്തമാണ്. ആദ്യം മറ്റൊരാൾ അന്വേഷിച്ച് പിന്നീട് ഹീറോ വന്ന് കേസ് പിടിക്കുന്ന പഴകിയ ഫോർമാറ്റ് ഇവിടെ ഇല്ല. പകരം, ഒരു പുതിയ ഓഫീസറുടെ യഥാർത്ഥ പോരാട്ടവും ആശങ്കകളും ക്ഷമയോടെയുള്ള അന്വേഷണവുമാണ് കഥയെ മുന്നോട്ട് കൊണ്ടുപോകുന്നത്. സ്റ്റേഷനിലെ ദൈനംദിന കേസുകളും ഉപകഥകളും പ്രധാന പ്ലോട്ടിനോടൊപ്പം സന്തുലിതമായി ഇണക്കിയിരിക്കുന്നത് ചിത്രത്തിന്റെ മറ്റൊരു ഹൈലൈറ്റാണ്. ടെൻഷൻ ഒരു നിമിഷം പോലും ഇളക്കാതെ സിനിമ മുന്നോട്ടുപോകുന്നു.

ഷെയ്ൻ നിഗം വിജയ് രാധാകൃഷ്ണനായി മികച്ച പ്രകടനം കാഴ്ചവെക്കുന്നു. മുൻപ് അവതരിപ്പിച്ച പോലീസ് കഥാപാത്രങ്ങളിൽ നിന്ന് തീർത്തും വ്യത്യസ്തമായ, ഹീറോയിസം കുറഞ്ഞ, സാധാരണ മനുഷ്യന്റെ ദൗർബല്യങ്ങളും ഉറച്ച തീരുമാനങ്ങളും നിറഞ്ഞ ഒരു കഥാപാത്രത്തെ അദ്ദേഹം യാഥാർത്ഥ്യബോധത്തോടെ ഉയർത്തിക്കാട്ടുന്നു.

ഷോബി തിലകൻ, ദിനേഷ് പ്രഭാകർ, നന്ദൻ ഉണ്ണി, കോട്ടയം രമേഷ്, വിനോദ് ബോസ് തുടങ്ങിയ ശക്തരായ അഭിനേതാക്കളുടെ സാന്നിധ്യം ചിത്രത്തിന്റെ വലിയ പോസിറ്റീവുകളിൽ ഒന്നാണ്. പി.എൻ. ഉണ്ണിക്കൃഷ്ണന്റെ ക്യാമറയും ശ്രീരാഗ് സജിയുടെ ബാക്ക്ഗ്രൗണ്ട് മ്യൂസിക്കും അന്വേഷണത്തിന്റെ അന്തരീക്ഷത്തെ കൂടുതൽ ഊർജ്ജിതമാക്കുന്നു.

ഇൻവെസ്റ്റിഗേറ്റീവ് ത്രില്ലർ ഇഷ്ടപ്പെടുന്നവർക്ക് ഏറെ സംതൃപ്തി നൽകുന്ന ഒരു ചിത്രമാണ് ദൃഢം. റൂറൽ സ്റ്റേഷന്റെ യാഥാർത്ഥ്യം, ഒരു തുടക്കക്കാരന്റെ മനസ്സിനുള്ളിലെ സംഘർഷം, ക്ലീഷേകളില്ലാത്ത നറേഷനും എല്ലാം കൃത്യമായി ബ്ലെൻഡ് ചെയ്തെടുത്ത ഒരു മികച്ച ത്രില്ലർ അനുഭവം അതാണ് ദൃഢം

E4 എക്സ്പെരിമെന്റ്സ്, ജീത്തു ജോസഫ് (ബെഡ് ടൈം സ്റ്റോറീസ്) എന്നിവർ ചേർന്നാണ് ചിത്രം പ്രേക്ഷകരുടെ മുന്നിൽ അവതരിപ്പിക്കുന്നത്. മുകേഷ് ആർ മെഹ്ത, സി വി സാരഥി എന്നിവർ ചേർന്നാണ് ചിത്രം നിർമ്മിച്ചിരിക്കുന്നത്. എക്സിക്യൂട്ടീവ് പ്രൊഡ്യൂസർ: കറ്റീന ജീത്തു, സൗണ്ട് ഡിസൈനർ: രാഹുൽ ജോസഫ്, സെത് എം ജേക്കബ്, സൗണ്ട് മിക്സ്: ജിതിൻ ജോസഫ്, പ്രൊഡക്ഷൻ ഡിസൈനർ: സുനിൽ ദാസ്, അസിസ്റ്റന്റ് ഡയറക്ടർ: അധിര രഘുനാഥൻ, അസോസിയേറ്റ് ഡയറക്ടർ: ക്യാത്തി ജീത്തു, അനൂപ് കെ.എസ്, ചീഫ് അസോസിയേറ്റ് സിനിമാറ്റോഗ്രാഫർ: അരവിന്ദ് ബാബു, മേക്കപ്പ്: രതീഷ് വിജയൻ, ആക്ഷൻ ഡയറക്ടർ: മഹേഷ് മാത്യു, പ്രൊഡക്ഷൻ കൺട്രോളർ: ദീപക് പരമേശ്വരൻ, വിഎഫ്എക്സ് ഡയറക്ടർ: ടോണി മാഗ്മിത്ത്, ഡിഐ കളറിസ്റ്റ്: ലിജു പ്രഭാകർ, കോസ്റ്റ്യൂം ഡിസൈനർ: ലേഖ മോഹൻ, ചീഫ് അസോസിയേറ്റ് ഡയറക്ടർ: അമരേഷ് കുമാർ, സ്റ്റിൽസ്: നന്ദു ഗോപാലകൃഷ്ണൻ, പബ്ലിസിറ്റി ഡിസൈൻ: ടെൻ പോയിന്റ്, മാർക്കറ്റിംഗ്: ടിംഗ്, പിആർഒ: ആതിര ദിൽജിത്ത്