വാളയാര്‍ പീഡനക്കേസിലെ പ്രതികള്‍ പാര്‍ട്ടിയുടെ ആള്‍ക്കാരാണെന്ന് മരിച്ച പെണ്‍കുട്ടികളുടെ അമ്മ. അരിവാള്‍ ചുറ്റിക പാര്‍ട്ടിയുമായി ബന്ധമുള്ള കേസിലെ പ്രതികള്‍ രക്ഷപ്പെട്ടത് പാര്‍ട്ടിയുടെ പിന്തുണയോടെയാണ്. പ്രതികള്‍ക്ക് ശിക്ഷ ഉറപ്പാക്കണം. എന്നാല്‍ പോലീസ് അപ്പീല്‍ പോകുന്നതില്‍ കാര്യമില്ലെന്നും പെണ്‍കുട്ടികളുടെ അമ്മ പറഞ്ഞു.
കേസിലെ പ്രതികള്‍ക്ക് വേണ്ടി ഇടപെട്ടിട്ടില്ലെന്ന് സിപിഎം നേതൃത്വം. പ്രതികള്‍ പാര്‍ട്ടിക്കാരാണെന്ന മരിച്ച പെണ്‍കുട്ടികളുടെ അമ്മയുടെ ആരോപണവും സിപിഎം നിഷേധിച്ചു. പ്രതികള്‍ക്ക് പാര്‍ട്ടിയുമായി ബന്ധമില്ല. കേസില്‍ അപ്പീല്‍ പോകണമെന്നും പുതുശ്ശേരി ഏരിയാ സെക്രട്ടറി സുഭാഷ് ചന്ദ്രബോസ് മനോരമ ന്യൂസിനോട് പറഞ്ഞു.
പോക്‌സോ കോടതി വിധിക്കെതിരെ അപ്പീല്‍ നല്‍കുന്നതിനുള്ള നടപടികള്‍ ആരംഭിച്ചു. നിയമോപദേശം ലഭിച്ചിട്ടുണ്ടെന്ന് തൃശൂര്‍ റേഞ്ച് ഡിഐജി എസ് സുരേന്ദ്രന്‍ പറഞ്ഞിരുന്നു. കേസ് അന്വേഷണത്തില്‍ വീഴ്ച സംഭവിച്ചില്ലെന്നാണ് പോലീസിന്റെ വാദം. തെളിവുകളുടെ അഭാവം തിരിച്ചടിയായതായാണ് വിലയിരുത്തുന്നത്. 2017 ജനുവരിയിലും മാര്‍ച്ചിലുമായാണ് അട്ടപ്പള്ളത്തെ പതിമൂന്നും ഒമ്പതും വയസ്സുള്ള പെണ്‍കുട്ടികളെ തൂങ്ങിമരിച്ച നിലയില്‍ കണ്ടെത്തിയത്. നാല് പ്രതികളെയാണ് കോടതി വെറുതെ വിട്ടത്.