അഗ്രീന്‍കോ അഴിമതി: എം കെ രാഘവന്‍ എംപിക്കെതിരെ 77 കോടിയുടെ വിജിലന്‍സ് കേസ്
എം കെ രാഘവന്‍ എംപിക്കെതിരെ 77 കോടി രൂപയുടെ അഴിമതി കേസില്‍ വിജിലന്‍സ് കേസെടുത്തു. കണ്ണൂരിലെ കേരളാ സ്റ്റേറ്റ് അഗ്രിക്കള്‍ച്ചറല്‍ കോ. ഓപ്പറേറ്റീവ് സൊസൈറ്റിയില്‍ അഴിമതി നടത്തിയെന്ന കേസിലാണ് നടപടി. എം കെ രാഘവന്‍ ഉള്‍പ്പെടെ 13 പേര്‍ക്കെതിരെ വിജിലന്‍സ് എഫ്‌ഐആര്‍ രജിസ്റ്റര്‍ ചെയ്തു.
അഗ്രീന്‍കോ സര്‍ക്കാരില്‍ നിന്നും ലഭിച്ച ഗ്രാന്‍ഡ്, വായ്പ എന്നിവയില്‍ തിരിമറി നടത്തിയെന്നാണ് വിജിലന്‍സിന്റെ കണ്ടെത്തല്‍. 2002 മുതല്‍ 2013 വരെയുള്ള കാലയളവില്‍ 77 കോടിയുടെ ക്രമക്കേട് നടത്തിയെന്നാണ് കണ്ടെത്തിയിരിക്കുന്നത്.
സഹകരണ വകുപ്പ് വിജിലന്‍സ് ഡിവൈഎസ്പി മാത്യൂരാജ് കള്ളിക്കാടനാണ് ക്രമക്കേടുകള്‍ കണ്ടെത്തിയത്. കണ്ണൂര്‍ വിജിലന്‍സ് ഡിവൈഎസ്പി വി മധുസൂദനനാണ് എഫ്‌ഐആര്‍ രജിസ്റ്റര്‍ ചെയ്തിരിക്കുന്നത്. ധനാപഹരണം, വ്യാജരേഖയുണ്ടാക്കല്‍, ഗൂഢാലോചന, അധികാര ദുര്‍വിനിയോഗം തുടങ്ങിയ വകുപ്പുകളാണ് ചുമത്തിയിരിക്കുന്നത്.
‘ദ ക്യു’ ഇപ്പോള്‍ ടെലഗ്രാമിലും ലഭ്യമാണ്. കൂടുതല്‍ വാര്‍ത്തകള്‍ക്കും അപ്‌ഡേറ്റുകള്‍ക്കുമായി ടെലഗ്രാം ചാനല്‍ സബ്‌സ്‌ക്രൈബ് ചെയ്യാം