തൃശ്ശൂരില്‍ ഡ്രൈവറെ തലയ്ക്കടിച്ച് പരിക്കേല്‍പ്പിച്ച് ഊബര്‍ ടാക്‌സി തട്ടിയെടുത്തു. പോലീസ് പിന്തുടര്‍ന്ന് കാലടിയില്‍ വെച്ച് കാര്‍ പിടികൂടി. അക്രമികള്‍ രക്ഷപ്പെട്ടു. രണ്ട് പേര്‍ക്കായി തിരച്ചില്‍ ആരംഭിച്ചു. പരിക്കേറ്റ ഡ്രൈവര്‍ രാജേഷിനെ ആശുപത്രിയില്‍ പ്രവേശിപ്പിച്ചു.

പുതുക്കാടിലേക്ക് ഓട്ടം വിളിച്ചവരാണ് അക്രമിച്ചത്. ആമ്പല്ലൂരില്‍ വെച്ചായിരുന്നു ആക്രമണം. തലയ്ക്കടിച്ച ശേഷം ഡ്രൈവറെ റോഡില്‍ തള്ളി കാറുമായി മുങ്ങുകയായിരുന്നു. ഡ്രൈവര്‍ പുതുക്കാട് പോലീസില്‍ വിവരമറിയിച്ചു.

പുതുക്കാട് പോലീസ് കാലടിയില്‍ വെച്ച് വണ്ടി പിടിച്ചെടുത്തെങ്കിലും പ്രതികള്‍ പോലീസിനെ വെട്ടിച്ച് രക്ഷപ്പെട്ടു. മുന്‍കൂട്ടി തയ്യാറാക്കിയാണ് ആക്രമണമെന്നാണ് പോലീസിന്റെ പ്രാഥമിക നിഗമനം. അന്വേഷണം ആരംഭിച്ചിട്ടുണ്ട്.