കെഎഎസ് പരീക്ഷയ്ക്ക് മലയാളത്തില് ചോദ്യങ്ങള് ലഭ്യമാക്കാത്തത് പിഎസ്സി ജനങ്ങളോട് കാട്ടുന്ന ധിക്കാരമാണെന്ന് സംവിധായകന് അടൂര് ഗോപാലകൃഷ്ണന്. പിഎസ്സിയുടെ ധിക്കാരത്തിന് കണക്ക് പറയേണ്ടി വരും. ഭാഷാനയം നടപ്പാക്കേണ്ട ആളുകളെ തെരഞ്ഞെടുക്കേണ്ട പരീക്ഷയില് തന്നെ മലയാളം എഴുതേണ്ട, ഇംഗ്ലീഷ് മതിയെന്ന് പറയുന്നത് വിഡ്ഢിത്തരമല്ല, ധിക്കാരമാണ്. മാതൃഭാഷയ്ക്ക് വേണ്ടി ഇങ്ങനെ സമരം ചെയ്യേണ്ടി വരുന്നത് നാണക്കേടാണെന്ന് അദ്ദേഹം ചോദിച്ചു.
സര്ക്കാര് പി.എസ്.സിയോട് അനാവശ്യമായ സൗമ്യത കാണിക്കുകയാണെന്നും അദ്ദേഹം പറഞ്ഞു. കെ.എ.എസ് പരീക്ഷയ്ക്ക് മലയാളത്തില് ചോദ്യങ്ങള് ലഭ്യമാക്കാത്തതില് പ്രതിഷേധിച്ച് ഐക്യ കേരള മലയാള പ്രസ്ഥാനം പിഎസ്സിയിലേക്ക് നടത്തിയ മാര്ച്ച് ഉദ്ഘാടനം ചെയ്യുകയായിരുന്നു അദ്ദേഹം. മലയാളത്തിലും ചോദ്യപേപ്പര് ലഭ്യമാക്കണമെന്നാവശ്യപ്പെട്ട് ഐക്യ മലയാള പ്രസ്ഥാനത്തിന്റെ നേതൃത്വത്തില് നേരത്തേ നിരാഹാരസമരം സംഘടിപ്പിച്ചിരുന്നു. ഈ ആവശ്യം സര്ക്കാര് അംഗീകരിക്കുകയും ചെയ്തിരുന്നു.
എന്നാല് ഇതിന് വിരുദ്ധമായാണ് കെഎഎസ് പരീക്ഷയില് ചോദ്യം ഇംഗ്ലീഷില് തന്നെയായിരിക്കുമെന്ന് പിഎസ്സി വ്യക്തമാക്കിയത്. ഈ സാഹചര്യത്തിലാണ് മാര്ച്ച് സംഘടിപ്പിച്ചത്. നിലപാട് തിരുത്താന് പിഎസ് സി തയ്യാറായില്ലെങ്കില് ഒരാഴ്ചയ്ക്കുള്ളില് വീണ്ടും നിരാഹാര സമരം തുടങ്ങാനാണ് ഐക്യമലയാള പ്രസ്ഥാനത്തിന്റെ നീക്കം. വിളക്കേന്തിയായിരുന്നു ഇന്നത്തെ മാര്ച്ച്. പിഎസ്സിയിലെ ദൈവങ്ങളെ വെളിച്ചം കാട്ടി ഉണര്ത്താനാണ് വിളക്കേന്തി സമരം നടത്തിയതെന്ന് സംഘാടകര് വ്യക്തമാക്കി.
‘ദ ക്യു’ ഇപ്പോള് ടെലഗ്രാമിലും ലഭ്യമാണ്. കൂടുതല് വാര്ത്തകള്ക്കും അപ്ഡേറ്റുകള്ക്കുമായി ടെലഗ്രാം ചാനല് സബ്സ്ക്രൈബ് ചെയ്യാം