പിണറായി വിജയന്‍ സര്‍ക്കാരിന് അഴിമതിക്കെതിരായ പോരാട്ടം തുടരാന്‍ ഇനിയും സമയമുണ്ടെന്ന് ജേക്കബ് തോമസ്. എല്‍ഡിഎഫ് സര്‍ക്കാരിന്റെ ആദ്യ എട്ട് മാസം മികച്ചതായിരുന്നുവെന്നും ഇന്ന് സര്‍വീസില്‍ നിന്ന് വിരമിക്കുന്ന ഡിജിപി ജേക്കബ് തോമസ് മാധ്യമങ്ങളോട് പറഞ്ഞു. ഇപി ജയരാജനെതിരെ ബന്ധുനിയമനത്തിന്റെ കേസില്‍ തീരുമാനമെടുത്തത് താനാണെന്നത് പൂര്‍ണമായും ശരിയല്ലെന്നും ഇതേക്കുറിച്ച് പിന്നീട് പറയാമെന്നും ജേക്കബ് തോമസ്.
പാലക്കാട് ഷൊര്‍ണൂര്‍ മെറ്റല്‍ ഇന്‍ഡസ്ട്രീസ് ലിമിറ്റഡ് ചെയര്‍മാന്‍ ആന്‍ഡ് എംഡി സ്ഥാനത്ത് നിന്നാണ് ജേക്കബ് തോമസ് വിരമിക്കുന്നത്. വിരമിക്കുന്നതിന് തലേന്നാള്‍ ഓഫീസ് മുറിയിലെ തറയിലാണ് ഉറങ്ങിയതെന്ന് അദ്ദേഹം ഫേസ്ബുക്ക് പോസ്റ്റിട്ടിരുന്നു.
ജേക്കബ് തോമസ് പറഞ്ഞത്
പിണറായി വിജയന്‍ സര്‍ക്കാരില്‍, ഞങ്ങളൊരുമിച്ച് അഴിമതി വിമുക്ത കേരളം പടുത്തുയര്‍ത്താന്‍ തുടങ്ങി. ഇനിയും ആ ഉദ്ദേശം നടപ്പാക്കാന്‍ സമയമുണ്ട്. ഇനിയുള്ള ഒരു വര്‍ഷം അത് ചെയ്യുമെന്നാണ് പ്രതീക്ഷ.
പിണറായി വിജയന്‍ സര്‍ക്കാരിന്റെ ആദ്യ എട്ടു മാസം മികച്ചതായിരുന്നു. കോട്ടക്കകത്ത് ഉപദേശക വൃന്ദമുണ്ട്, പരിചാരക വൃന്ദമുണ്ട്, ഇപ്പോള്‍ സൈബര്‍ വൃന്ദവുമുണ്ട്. ആദ്യത്തെ എട്ട് മാസം അഴിമതിക്കെതിരെ നിലപാട് എടുത്തത് പോലെ അഴിമതിക്കെതിരെ അകറ്റിനിര്‍ത്തി ഇനിയും അതു പോലെനിലപാട് എടുക്കണം.