കാസര്‍കോട് കൊവിഡ് വൈറസ് ബാധിച്ച ആദ്യരോഗിയില്‍ നിന്നും 11 പേരിലേക്ക് രോഗം പകര്‍ന്നു. 16ഉം 11 വയസ്സുള്ള കുട്ടികള്‍ക്കും കൊവിഡ് ബാധിച്ചു. ഇന്നലെ രോഗം സ്ഥിരീകരിച്ച 11 പേരും ഈ രോഗിയുടെ അടുത്ത ബന്ധുക്കളാണ്.

ഇന്നലെ കാസര്‍കോട് 34 പേര്‍ക്കാണ് രോഗം സ്ഥിരീകരിച്ചിരുന്നത്. രോഗിയുടെ ബന്ധുക്കളായ 9 സ്ത്രീകള്‍ക്കും വൈറസ് ബാധയുണ്ട്. ഉദുമ, ചെങ്കള, ബോവിക്കാനം, മഞ്ചേശ്വരം, പടന്ന, നെല്ലിക്കുന്ന്, തളങ്കര മേഖലകളിലുള്ളവരാണ് രോഗികള്‍.

കാസര്‍കോടുള്ള രോഗികള്‍ കൂടുതലായി ആശ്രയിക്കുന്ന കര്‍ണാടകയിലെ ചുരം റോഡ് മണ്ണിട്ട് അടച്ചിരിക്കുകയാണ്. മണ്ണ് നീക്കം ചെയ്യുന്ന കാര്യത്തില്‍ ചീഫ് സെക്രട്ടറിതല ചര്‍ച്ചയിലും തീരുമാനമായില്ല. മാക്കൂട്ടത്താണ് മണ്ണിട്ടിരിക്കുന്നത്. കര്‍ണാടക സര്‍ക്കാരുമായി ചര്‍ച്ച നടത്തുമെന്ന് മുഖ്യമന്ത്രി പിണറായി വിജയന്‍ ഇന്നലെ അറിയിച്ചിരുന്നു.