ജെഎന്‍യുവില്‍ അക്രമിക്കപ്പെട്ട വിദ്യാര്‍ത്ഥികളുടെ ചോരയൊലിക്കുന്ന മുഖം ടിവിയില്‍ കണ്ടപ്പോള്‍ ഞെട്ടിപ്പോയെന്ന് നടി മഞ്ജു വാര്യര്‍. രാഷ്ട്രീയ അഭിപ്രായ വ്യത്യാസങ്ങളെ അടിച്ചമര്‍ത്തുകയല്ല വേണ്ടത്. അക്രമിക്കപ്പെട്ട വിദ്യാര്‍ത്ഥികള്‍ക്ക് ഫേസ്ബുക്ക് പോസ്റ്റിലൂടെ മഞ്ജു വാര്യര്‍ പിന്തുണ പ്രഖ്യാപിച്ചു.
ജെഎന്‍യു എന്നത് രാജ്യത്തിന്റെ അറിവിന്റെ അടയാളമായിരുന്നുവെന്നും മഞ്ജു വാര്യര്‍ പറയുന്നു. അവിടെ പഠിച്ച പലരുമാണ് ഇപ്പോള്‍ നയിക്കുന്നതും ഭരിക്കുന്നതും. ഇവരുടെ രാഷ്ട്രീയം വ്യത്യസ്തമാണെങ്കിലും രാജ്യസ്‌നേഹം ചോദ്യംചെയ്യാനാകില്ലെന്നും മഞ്ജു പറയുന്നു.
ഇരുട്ടിന്റെ മറവില്‍ വിദ്യാര്‍ത്ഥികളെ അക്രമിച്ചവരുടെ രാഷ്ട്രീയം എന്തായാലും അവരെ പിന്തുണയ്ക്കാനാവില്ല. അക്രമിക്കപ്പെട്ട വിദ്യാര്‍ത്ഥികളുടെ മുഖം ടിവിയില്‍ കാണുമ്പോള്‍ സാധാരണക്കാരായ അവരുടെ അമ്മമാരുടെ അവസ്ഥ എന്തായിരിക്കുമെന്നും മഞ്ജു വാര്യര്‍ ചോദിക്കുന്നു.
മഞ്ജു വാര്യരുടെ ഫേസ്ബുക്ക് പോസ്റ്റിന്റെ പൂര്‍ണരൂപം