മന്ത്രി ജെ മേഴ്‌സിക്കുട്ടിയമ്മയ്ക്ക് നേരെ കൊലവിളി പ്രസംഗവുമായി യുവമോര്‍ച്ച നേതാവ്. മന്ത്രിയെയും മക്കളേയും പൊലീസ് ഉദ്യോഗസ്ഥരെയും കുടുംബത്തെയും തെരഞ്ഞ് പിടിച്ച് ആക്രമിക്കുമെന്നാണ് ഭീഷണി. യുവമോര്‍ച്ച സംസ്ഥാന സെക്രട്ടറി ശ്യാംരാജാണ് പരസ്യമായി കൊലവിളി നടത്തിയത്. സിപിഎം പ്രവര്‍ത്തകരുടെ പരാതിയില്‍ കുണ്ടറ പൊലീസ് കേസെടുത്തു.
മന്ത്രിയും പൊലീസുകാരും അവരുടെ കുടുംബാംഗങ്ങളും എവിടെയാണെന്നും എപ്പോള്‍ തിരിച്ചു വരുമെന്നും തങ്ങള്‍ക്കറിയാം.കുടുംബാംഗങ്ങള്‍ ജോലി ചെയ്യുന്ന സ്ഥലവും കുട്ടികള്‍ പഠിക്കുന്നത് എവിടയാണെന്ന വിവരവും കൈയ്യിലുണ്ട്. യുവമോര്‍ച്ചക്കാരുടെ വീട്ടില്‍ കയറുന്ന പൊലീസുകാര്‍ക്ക് അതേ നാണയത്തില്‍ തിരിച്ചടി കൊടുക്കുമെന്നും ശ്യാംരാജ് ഭീഷണിപ്പെടുത്തി.
പാരിപ്പള്ളിയില്‍ മന്ത്രി കെ ടി ജലീലിന്റെ കാറിന് കുറുകെ വാഹനം നിര്‍ത്തി അപായപ്പെടുത്താന്‍ ശ്രമിച്ച കേസിലെ യുവമോര്‍ച്ച പ്രവര്‍ത്തകരുടെ വീടുകളില്‍ പൊലീസ് പരിശോധന നടത്തിയിരുന്നു. ഇതില്‍ പ്രതിഷേധിച്ചായിരുന്നു മന്ത്രി മേഴ്‌സിക്കുട്ടിയമ്മയുടെ ഓഫീസിലേക്ക് മാര്‍ച്ച് നടത്തിയത്.