സര്‍ക്കാര്‍ പരിപാടിയില്‍ പങ്കെടുക്കുന്നതില്‍ നിന്നും ട്വന്റി 20 ഭരണസമിതിയെ ചീഫ് കോര്‍ഡിനേറ്ററും അന്ന-കിറ്റക്‌സ് ഗ്രൂപ്പ് എം.ഡിയുമായ സാബു ജേക്കബ് വിലക്കി. കുന്നത്താട് പഞ്ചായത്തിലെ കുടുംബാരോഗ്യ കേന്ദ്രത്തിന്റെ നിര്‍മാണോദ്ഘാടനത്തിന് ട്വന്റി 20 പഞ്ചായത്ത് പ്രസിഡന്റ് എം.വി നിതാ മോളും 11 പ്രതിനിധികളും പങ്കെടുത്തില്ല. പഞ്ചായത്ത് പ്രസിഡന്റ് ഉള്‍പ്പെടെ ഭരണസമിതി അംഗങ്ങളെ പരിപാടിയിലേക്ക് ക്ഷണിച്ചിരുന്നുവെന്ന് വി.പി.സജീന്ദ്രന്‍ എം.എല്‍.എ പറഞ്ഞു.

മൂന്ന് മാസത്തേക്ക് ഇത്തരം പരിപാടികളില്‍ പങ്കെടുക്കേണ്ടതില്ലെന്നാണ് ട്വന്റി20യുടെ തീരുമാനമെന്നാണ് പഞ്ചായത്ത് ഭാരവാഹികളുടെ പ്രതികരണം. മാധ്യമ ശ്രദ്ധ കിട്ടുന്നതിന് വേണ്ടിയാണ് പരിപാടി സംഘടിപ്പിച്ചതെന്നും ട്വന്റി 20 ആരോപിക്കുന്നു.

കുടുംബാരോഗ്യ കേന്ദ്രങ്ങളുടെ ചുമതല പഞ്ചായത്തുകള്‍ക്കാണ്. എന്നിട്ടും പഞ്ചായത്ത് ഭരണസമിതി വിട്ട് നിന്നത് വിമര്‍ശനത്തിന് ഇടയാക്കിയിട്ടുണ്ട്. കുന്നത്തുനാട് മണ്ഡലം ആസ്തി വികസന ഫണ്ടിയില്‍ നിന്നും വി.പി.സജീന്ദ്രന്‍ എം.എല്‍.എ നല്‍കിയ 30 ലക്ഷം രൂപ ചിലവിട്ടാണ് കെട്ടിടം നിര്‍മ്മിക്കുന്നത്.