തിരുവനന്തപുരം യൂണിവേഴ്‌സിറ്റി കോളേജില്‍ വിദ്യാര്‍ത്ഥിയ്ക്ക് എസ്എഫ്‌ഐ നേതാക്കളുടെ കുത്തേറ്റ സംഭവത്തില്‍ കേരള ജനതയോട് മാപ്പ് ചോദിക്കുകയാണെന്ന് അഖിലേന്ത്യാ പ്രസിഡന്റ് വി പി സാനു. ലജ്ജിച്ച് തലതാഴ്ത്തുകയാണെന്നും വിദ്യാര്‍ത്ഥിയെ കുത്തിയവര്‍ എസ്എഫ്‌ഐക്കാര്‍ അല്ല. മുദ്രാവാക്യങ്ങളേയും രക്തസാക്ഷിത്വങ്ങളുടേയും ഒറ്റുകാര്‍ മാത്രമാണെന്നും സാനു വ്യക്തമാക്കി. ഫേസ്ബുക്കിലൂടെയായിരുന്നു എസ്എഫ്‌ഐ അഖിലേന്ത്യാ നേതാവിന്റെ പ്രതികരണം.
ഞങ്ങളുടെ അഭിമന്യുവിന്റെ നെഞ്ചിലാഴ്ന്നിറങ്ങിയ കഠാരയല്ല, അവന്‍ എഴുതി വെച്ച മുദ്രാവാക്യം ആയുധമാക്കിയവരാണ് എസ്എഫ്‌ഐക്കാര്‍. അല്ലാത്തവര്‍ ഒറ്റുകാര്‍ മാത്രമാണ്. കടിച്ചുകീറാന്‍ തക്കം പാര്‍ത്തിരിക്കുന്നവരുടെയിടയിലേക്ക് ഈ പ്രസ്ഥാനത്തെയും, ശുഭ്രപതാകയെയും, മുദ്രാവാക്യങ്ങളെയും, രക്തസാക്ഷിത്വങ്ങളെയും ഇട്ടുകൊടുത്ത ഒറ്റുകാര്‍. വി പി സാനു
സ്വാതന്ത്ര്യത്തിനും ജനാധിപത്യത്തിനും നിറം കൊടുത്ത സ്വപ്നങ്ങളെയും കാലങ്ങളായി അവര്‍ നയിച്ച പോരാട്ടങ്ങളെയുമാണ് കുറഞ്ഞ മണിക്കൂറുകളില്‍, ഒരു കലാലയത്തിനകത്ത് കുറച്ചാളുകള്‍ ചേര്‍ന്ന് ഒറ്റുകൊടുത്തത്. ഈ ഇരുണ്ട കാലത്ത് പ്രത്യാശയുടെ തീജ്വാലയായി നമ്മളെ നോക്കുന്നവരെ വഞ്ചിക്കരുത്. തെറ്റുകള്‍ ഒരിക്കലും ന്യായീകരിക്കില്ല. കുറ്റവാളികളെ ഒരുനാളും സംരക്ഷിക്കില്ല. തളര്‍ച്ചയല്ല. തിരുത്തലാണ് വേണ്ടത്. സ്വയം നവീകരിച്ച് മുന്നേറണം. കാലത്തോടും ചരിത്രത്തോടും പ്രായശ്ചിത്തം ചെയ്യണമെന്നും എസ്എഫ്‌ഐ അഖിലേന്ത്യാ പ്രസിഡന്റ് കൂട്ടിച്ചേര്‍ത്തു.