ആലപ്പുഴയിലെ പോപ്പുലര് ഫ്രണ്ട് റാലിയില് വിദ്വേഷ മുദ്രാവാക്യം വിളിക്കാന് പ്രായപൂര്ത്തിയാകാത്ത കുട്ടിക്ക് പരിശീലനം നല്കിയെന്ന് പൊലീസിന്റെ റിമാന്ഡ് റിപ്പോര്ട്ട്. മതവികാരം ആളിക്കത്തിക്കാന് പ്രതികള് ലക്ഷ്യമിട്ടു എന്ന് റിമാന്ഡ് റിപ്പോര്ട്ട് പറയുന്നു. ഇതിനായി കുട്ടിയെ ചുമലിലേറ്റി പ്രകോപനപരമായ മുദ്രാവാക്യം വിളിപ്പിച്ചു. മുസ്ലിം ജനവിഭാഗത്തെ ഇളക്കിവിടാന് ശ്രമിച്ചുവെന്നും റിമാന്ഡ് റിപ്പോര്ട്ടില് പറയുന്നു.
പ്രായപൂര്ത്തിയാകാത്ത കുട്ടികളെ കുറ്റകൃത്യങ്ങളില് പങ്കാളിയാക്കിയെന്ന റിമാന്ഡ് റിപ്പോര്ട്ടിലെ കണ്ടെത്തലിനെ തുടര്ന്ന് പ്രതികള്ക്കെതിരെ ബാലനീതി നിയമപ്രകാരമുള്ള കുറ്റങ്ങളും ചുമത്തിയിട്ടുണ്ട്. കേസില് നിലവില് മൂന്ന് പ്രതികളാണ് ഉള്ളത്. പോപ്പുലര് ഫ്രണ്ട് ആലപ്പുഴ ജില്ലാ സെക്രട്ടറി മുജീബ് യാക്കൂബ് രണ്ടാം പ്രതി ആണ്.
ആലപ്പുഴയില് നടന്ന പോപ്പുലര് ഫ്രണ്ട് റാലിയിലാണ് പ്രായപൂര്ത്തിയാകാത്ത കുട്ടി വിദ്വേഷ മുദ്രാവാക്യം വിളിച്ചത്. റാലിയില് കുട്ടി വിളിച്ച് കൊടുത്ത മുദ്രാവാക്യം മറ്റുള്ളവര് ഏറ്റുവിളിക്കുകയായിരുന്നു. സംഭവത്തിന്റെ വീഡിയോ ദൃശ്യങ്ങള് പുറത്തായതോടെയാണ് വിവാദം ഉയര്ന്നത്.