ദേവനന്ദയുടെ മൃതദേഹം ഒഴുകി വന്നതാണെന്ന് പൊലീസിന്റെ മുങ്ങല്‍ വിദഗ്ധന്‍. വള്ളിയില്‍ ഉടക്കി നിന്നതാണെന്നും തിരച്ചിലില്‍ ഏര്‍പ്പെട്ട മനോജ് ഏഷ്യാനെറ്റ് ന്യൂസിനോട് പറഞ്ഞു. തലമുടി വള്ളിയില്‍ ഉടക്കികിടക്കുകയായിരുന്നു. ഇല്ലായിരുന്നെങ്കില്‍ കൂടുതല്‍ ദൂരം ഒഴുകിപ്പോകുമായിരുന്നു. രാവിലെ 7 മണിമുതലാണ് പരിശോധന ആരംഭിച്ചത്. നീണ്ടകര കോസ്റ്റല്‍ പൊലീസ് സ്‌റ്റേഷനിലെ താനുള്‍പ്പെടെ 4 പേരാണ് തിരച്ചിലില്‍ ഏര്‍പ്പെട്ടത്. നല്ല അടിയൊഴുക്കുണ്ടായിരുന്നുവെന്നും മനോജ് പറയുന്നു.

പ്രദേശവാസികളാണ് ആദ്യം കണ്ടത്. ഉന്നത ഉദ്യോഗസ്ഥരുടെ നിര്‍ദേശപ്രകാരം ആ ഭാഗത്തേക്ക് എത്തി മൃതദേഹം പുറത്തെടുക്കുകയായിരുന്നു. നടപ്പാലത്തിന്റെ അടിവശം പാറക്കെട്ടുണ്ട്. എന്നാല്‍ ഒന്നരമീറ്ററോളം വിടവുണ്ട്. അതിനടിയിലൂടെയാണ് ഒഴുകി വന്നിരിക്കുന്നത്. അങ്ങനെ വന്ന് വള്ളിയില്‍ ഉടക്കിനില്‍ക്കുകയായിരുന്നു. മൃതദേഹം ഒഴുകിവന്നതായാണ് മനസ്സിലാക്കുന്നതെന്നും മനോജ് വിശദീകരിക്കുന്നു.