ഗാര്ഹിക പീഡന പരാതി നല്കിയ സ്ത്രീയോട് മോശമായി സംസാരിച്ച വനിതാ കമ്മീഷന് അധ്യക്ഷ എം.സി. ജോസഫൈനെതിരെ സോഷ്യൽ മീഡിയയിൽ പ്രതിഷേധം കനക്കുന്നു. ഭര്തൃഗൃഹമോ വനിതാ കമ്മീഷനോ ഭേദം എന്നായിരുന്നു എം.സി. ജോസഫൈന്റെ വീഡിയോ പങ്കുവെച്ചു കൊണ്ട് എഴുത്തുകാരി ശാരദക്കുട്ടി പ്രതികരിച്ചത്.
ഭര്തൃഗൃഹമോ വനിതാ കമ്മീഷനോ ഭേദം? സര്ക്കാരിനോട് ഒരഭ്യര്ഥന, പെണ്പിള്ളേരെ പേടിപ്പിക്കുന്ന ഒരുത്തരേം വെറുതെ വിടരുത്,’ ശാരദക്കുട്ടിയുടെ ഫേസ്ബുക്ക് പോസ്റ്റില് പറയുന്നു.
ഗാര്ഹിക പീഡനം നേരിടുന്നവര്ക്ക് തല്സമയം പരാതി നല്കാനായി മനോരമ ന്യൂസ് ചാനല് നടത്തിയ പരിപാടിയിലാണ് ഭര്ത്താവ് ഉപദ്രവിക്കുന്നുവെന്ന് പറഞ്ഞയാളോട് വനിതാ കമ്മീഷന് അധ്യക്ഷ മോശമായി പെരുമാറിയത്. തുടക്കം മുതല് അസ്വസ്ഥതയോടെയും ദേഷ്യത്തോടെയുമാണ് വനിതാ കമ്മീഷന് അധ്യക്ഷ പീഡന പരാതി ഉന്നയിച്ച ആളോട് സംസാരിച്ചത്. 2014ലാണ് വിവാഹം കഴിഞ്ഞതെന്നും ഭര്ത്താവ് നിരന്തരം ഉപദ്രവിക്കുന്നതായും കൊച്ചിയില് നിന്ന് ചാനലിലേക്ക് ഫോണ് ചെയ്ത യുവതി പറഞ്ഞത്. കുട്ടികളില്ലെന്നും ഭര്ത്താവും അമ്മായിയമ്മയും ഉപദ്രവിക്കുന്നുവെന്ന് പറഞ്ഞപ്പോള് എന്ത് കൊണ്ട് പൊലീസില് പരാതിപ്പെട്ടില്ലെന്ന് എം.സി ജോസഫൈന് ചോദിച്ചു. ആരെയും അറിയിച്ചില്ലെന്ന് പരാതിക്കാരി പറഞ്ഞപ്പോൾ എന്നാല് പിന്നെ അനുഭവിച്ചോ എന്നായിരുന്നു എം.സി.ജോസഫൈന്റെ ആദ്യ പ്രതികരണം.
കൊടുത്ത സ്ത്രീധനം തിരിച്ചുകിട്ടാനും നഷ്ടപരിഹാരത്തിനും നല്ല വക്കീല് വഴി കുടുംബകോടതിയെ സമീപിക്കണമെന്ന് പിന്നീട് ജോസഫൈന് പറഞ്ഞു. വനിതാ കമ്മീഷനില് വേണേല് പരാതിപ്പെട്ടോ എന്നും വനിതാ കമ്മീഷന് അധ്യക്ഷ. എണ്പത്തൊമ്പത് വയസ്സുള്ള കിടപ്പ് രോഗിയുടെ പരാതി കേള്ക്കണമെങ്കില് നേരിട്ട് ഹാജരാകണമെന്ന് ആവശ്യപ്പെട്ട സംസ്ഥാന വനിതാ കമ്മീഷന് അധ്യക്ഷ എം സി ജോസഫൈനെതിരെ മുമ്പ് രൂക്ഷ വിമര്ശനം ഉയര്ന്നിരുന്നു.