മലയാളി വ്ളോഗര് റിഫ മെഹ്നുവിന്റെ മരണത്തില് ഭര്ത്താവ് മെഹ്നാസിനെതിരെ ലുക്ക് ഔട്ട് നോട്ടീസ്. തുടര്ച്ചയായി ചോദ്യം ചെയ്യലിന് ഹാജരാകാന് ആവശ്യപ്പെട്ടിട്ടും എത്താതിരുന്നതിനെ തുടര്ന്നാണ് അന്വേഷണ സംഘം ലുക്ക് ഔട്ട് നോട്ടീസ് പുറപ്പെടുവിച്ചത്. റിഫയുടെ പോസ്റ്റ്മോര്ട്ടം റിപ്പോര്ട്ടും രാസപരിശോധന ഫലവും അടുത്ത ദിവസം കിട്ടുമെന്നാണ് കരുതുന്നത്.
കഴിഞ്ഞ ദിവസം താമരശ്ശേരി ഡി.വൈ.എസ്.പിയും സംഘവും കാസര്കോട്ടുള്ള മെഹ്നാസിന്റെ വീട്ടില് എത്തിയിരുന്നു. കുടുംബാംഗങ്ങളെയും സുഹൃത്തുക്കളെയും നേരില് കണ്ട് അന്വേഷണ സംഘം മൊഴിയെടുത്തെങ്കിലും മെഹ്നാസിനെ കണ്ടെത്താനായില്ല.
വ്യാഴാഴ്ചയ്ക്കകം കോഴിക്കോട്ടെത്തി അന്വേഷണ സംഘത്തിന് മുന്നില് ഹാജരാകാന് മെഹ്നാസിന് സമയം നല്കിയിരുന്നു. എന്നാല് പെരുന്നാളിന് ശേഷം യാത്ര പോയ മെഹ്നാസ് ഇതുവരെ തിരിച്ചെത്തിയിട്ടില്ലെന്നാണ് വീട്ടുകാര് പറയുന്നത്.
മെഹ്നാസ് സംസ്ഥാന അതിര്ത്തി കടന്നെന്നാണ് പൊലീസ് നിഗമനം. റിഫയുടെ മരണത്തില് ദുരൂഹത ആരോപിച്ച് കുടുംബാംഗങ്ങള് പരാതി നല്കിയതിന് പിന്നാലെയാണ് മറവ് ചെയ്ത മൃതദേഹം പുറത്തെടുത്ത് റീ പോസ്റ്റ്മോര്ട്ടം ചെയ്തത്. മാര്ച്ച് ഒന്നിനാണ് ദുബായിലെ ഫ്ളാറ്റില് റിഫ മെഹ്നുവിനെ തൂങ്ങിമരിച്ച നിലയില് കണ്ടെത്തുന്നത്.