കൊച്ചി മെട്രോയില്‍ പോസ്റ്റ്-പ്രീ ഫോട്ടോ ഷൂട്ടുകള്‍ക്ക് അനുമതി. മെട്രോയുടെ വരുമാനം വര്‍ധിപ്പിക്കല്‍ ലക്ഷ്യം വെച്ചാണ് വിവാഹ ഫോട്ടോഷൂട്ടുകള്‍ക്ക് അനുമതി നല്‍കിയിരിക്കുന്നത്.

സിനിമ-പരസ്യ ഷൂട്ടുകള്‍ എടുക്കുന്നതിന് നേരത്തെ തന്നെ അനുമതി നല്‍കിയിരുന്നു. വിവാഹ ഫോട്ടോഷൂട്ടുകള്‍ക്ക് സിനിമ-പരസ്യ ഫോട്ടോഷൂട്ടുകള്‍ക്ക് നല്‍കേണ്ടതിനേക്കാള്‍ കുറച്ച് തുക നല്‍കിയാല്‍ മതിയാകും.

നിശ്ചലമായ ട്രെയിനില്‍ ഒരു കോച്ച് രണ്ട് മണിക്കൂര്‍ നേരത്തേക്ക് ബുക്ക് ചെയ്യാന്‍ 5000 രൂപ നല്‍കണം. ഇതിന് 10,000 രൂപ സെക്യൂരിറ്റി ഡെപ്പോസിറ്റ് നല്‍കണം. മൂന്ന് കോച്ചിന് രണ്ട് മണിക്കൂര്‍ നേരത്തേക്ക് 12,000 രൂപയാണ്. ഇതിനായി 25,000 രൂപയാണ് സെക്യൂരിറ്റി ഡെപ്പോസിറ്റായി നല്‍കേണ്ടത്.

ഓടുന്ന ട്രെയിനില്‍ ഒരു കോച്ച് രണ്ട് മണിക്കൂര്‍ നേരത്തേക്ക് ബുക്ക് ചെയ്യാന്‍ 8000 രൂപ നല്‍കണം. 25,000 രൂപയാണ് ഇതിന് സെക്യൂരിറ്റി ഡെപ്പോസിറ്റായി നല്‍കേണ്ടത്. മൂന്ന് കോച്ചുകള്‍ക്ക് 17,500 രൂപ നല്‍കണം. ഇത് ആലുവയില്‍ നിന്ന് പേട്ടയിലേക്കും തിരിച്ചും സര്‍വീസ് നടത്തും. 25,000 രൂപയാണ് സെക്യൂരിറ്റി ഡെപ്പോസിറ്റായി നല്‍കേണ്ടത്.