റാഞ്ചിയില്‍ ബൈക്ക് മോഷണം ആരോപിച്ച് ആള്‍ക്കൂട്ടം തല്ലിക്കൊന്ന തബ്രിസ് അന്‍സാരിയുടെ മൊഴിയില്‍ നിന്ന് പൊലീസ് മര്‍ദ്ദനത്തേക്കുറിച്ചുള്ള പരാമര്‍ശം ഒഴിവാക്കിയെന്ന് ആരോപണം. അന്വേഷണസംഘം ചീഫ് ജുഡീഷ്യല്‍ മജിസ്‌ട്രേറ്റിന് മുന്നില്‍ ഹാജരാക്കിയ മൊഴിയില്‍ ക്രൂരമര്‍ദ്ദനത്തേ പറ്റിയോ പ്രതികളേ പറ്റിയോ വിവരമില്ല. ബൈക്ക് മോഷ്ടിച്ചതായുള്ള അന്‍സാരിയുടെ കുറ്റസമ്മത മൊഴി മാത്രമാണ് പൊലീസ് രേഖപ്പെടുത്തിയിരിക്കുന്നത്.

'സുഹൃത്തുക്കളായ നുമൈര്‍, ഇര്‍ഫാന്‍ എന്നിവര്‍ക്കൊപ്പം മതില്‍ ചാടിക്കടന്ന്, മേല്‍ക്കൂരകളില്‍ കയറി ഗ്രാമത്തില്‍ നിന്നും രജിസ്‌ട്രേഷന്‍ ഇല്ലാത്ത ബൈക്ക് മോഷ്ടിച്ചു, മറ്റൊരു വീട്ടിലും മോഷ്ടിക്കാന്‍ ശ്രമം നടത്തി. പക്ഷെ ആളുകള്‍ കള്ളന്‍, കളളന്‍ എന്ന് വിളിച്ച് ഓടിക്കൂടി. അതോടെ രക്ഷപ്പെടാന്‍ ശ്രമിച്ചു.' എന്ന് അന്‍സാരി പറഞ്ഞെന്നാണ് പൊലീസിന്റെ വാദം. പൊലീസിന്റെ കുറ്റസമ്മതമൊഴി നുണയാണെന്നാണ് കുടുംബം ചൂണ്ടിക്കാണിക്കുന്നത്. ലോക്കപ്പില്‍ ചെന്ന് കാണുമ്പോള്‍ അന്‍സാരി അതീവ ക്ഷീണിതനായിരുന്നെന്നും സംസാരിക്കാന്‍ പറ്റാത്ത അവസ്ഥയിലായിരുന്നെന്നും അമ്മാവന്‍ മക്‌സൂദ് അലം പറയുന്നു.

അന്‍സാരിയെ കാണാന്‍ അനുവദിച്ചില്ലെന്നും കുടുംബം പരാതിപ്പെടുന്നു. കേണപേക്ഷിച്ചിട്ടും പൊലീസ് അന്‍സാരിയ്ക്ക് ചികിത്സ നിഷേധിച്ചു. മരിച്ചതിന് ശേഷമാണ് അന്‍സാരിയെ പൊലീസ് ആശുപത്രിയില്‍ എത്തിച്ചതെന്നും കുടുംബം ആരോപിക്കുന്നു.

ജൂണ്‍ 18ന് അറസ്റ്റ് ചെയ്യപ്പെട്ട അന്‍സാരി ജൂണ്‍ 18നാണ് മരണത്തിന് കീഴടങ്ങുന്നത്. കൊലപാതകവുമായി ബന്ധപ്പെട്ട് 11 പേരെ അറസ്റ്റ് ചെയ്തിട്ടുണ്ട്. 'വിഷയം ശ്രദ്ധയോടെ കൈകാര്യം ചെയ്തില്ലെന്ന്' ആരോപിച്ച് രണ്ട് പൊലീസ് ഉദ്യോഗസ്ഥരെ സസ്‌പെന്‍ഡ് ചെയ്തു. അന്‍സാരിയുടെ അറസ്റ്റിന് ശേഷം ആരോഗ്യപരിശോധന നടത്തി ചികിത്സ വേണ്ടതില്ലെന്ന് വിധിയെഴുതിയ ഡോക്ടര്‍ക്കെതിരെയും അന്വേഷണമുണ്ട്.