ഡല്ഹി കലാപവുമായി ബന്ധപ്പെട്ട് വിദ്വേഷ പ്രസംഗം നടത്തിയ ബിജെപി നേതാക്കള്ക്കെതിരെ ഉടന് കേസെടുക്കില്ല. കേസില് സത്യവാങ്മൂലം നല്കാന് കേന്ദ്രസര്ക്കാരിന് നാല് ആഴ്ച സമയം അനുവദിച്ചു. ഡല്ഹി ഹൈക്കോടതി ചീഫ് ജസ്റ്റിസിന്റേതാണ് നടപടി.
ദ ക്യു’ ഇപ്പോള് ടെലഗ്രാമിലും ലഭ്യമാണ്. കൂടുതല് വാര്ത്തകള്ക്കും അപ്ഡേറ്റുകള്ക്കുമായി ടെലഗ്രാം ചാനല് സബ്സ്ക്രൈബ് ചെയ്യാം
വിദ്വേഷ പ്രസംഗം നടത്തിയ ബിജെപി നേതാക്കള്ക്കെതിരെ ഉടന് കേസെടുക്കില്ലെന്ന് ഡല്ഹി പൊലീസിന് വേണ്ടി ഹാജരായ സോളിസിറ്റര് ജനറല് പറഞ്ഞു. കൂടുതല് സമയം വേണമെന്നും ഉചിതമായ സമയത്ത് എഫ്ഐആര് രജിസ്റ്റര് ചെയ്യുമെന്നും സോളിസിറ്റര് ജനറല് തുഷാര് മേത്ത പറഞ്ഞു. കോടതിക്ക് മുന്പാകെ എത്തിയ ദൃശ്യങ്ങള് ഗൂഢമായ ഉദ്ദേശത്തോടെയുള്ളതാണെന്നും സോളിസിറ്റര് ജനറല് പറഞ്ഞു. ഡല്ഹിയിലെ കലാപവുമായി ബന്ധപ്പെട്ട് ഇതുവരെ 48 കേസുകള് രജിസ്റ്റര് ചെയ്തിട്ടുണ്ട്. ക്രമസമാധാനം പുനസ്ഥാപിക്കാനാണ് ഇപ്പോള് പരിഗണന. വീഡിയോ പരിശോധിച്ച് വിശദമായ റിപ്പോര്ട്ട് ഡല്ഹി പൊലീസ് സമര്പ്പിക്കണമെന്നും തുഷാര് മേത്ത വാദിച്ചു.
വിദ്വേഷ പ്രസംഗം നടത്തിയ ബിജെപി നേതാക്കള്ക്കെതിരെ എഫ്ഐആര് രജിസ്റ്റര് ചെയ്യാന് ബുധനാഴ്ച ജസ്റ്റിസ് എസ് മുരളീധര് ഉത്തരവിട്ടിരുന്നു. മുരളീധറിനെ ഇന്നലെ ഛണ്ഡീഗഡ് പഞ്ചാബ് ആന്റ് ഹരിയാന കോടതിയിലേക്ക് സ്ഥലം മാറ്റിയാണ് കേസ് ചീഫ് ജസ്റ്റിസിന്റെ ബെഞ്ചിലേക്ക് മാറ്റിയത്. ജസ്റ്റിസ് മുരളീധറിനെ സ്ഥലം മാറ്റാന് നേരത്തെ കൊളീജിയം ശുപാര്ശ ചെയ്തിരുന്നുവെന്നാണ് കേന്ദ്രസര്ക്കാര് നല്കിയ വിശദീകരണം.