കോണ്‍ഗ്രസ് ദേശീയ അദ്ധ്യക്ഷസ്ഥാനത്ത് നിന്ന് രാജി വെയ്ക്കുന്നുവെന്ന് വ്യക്തമാക്കുന്ന കത്ത് പുറത്തുവിട്ട് രാഹുല്‍ ഗാന്ധി. കോണ്‍ഗ്രസ് പാര്‍ട്ടിയില്‍ സേവനം ചെയ്യാനായത് അംഗീകാരമായി കാണുന്നു. തുടര്‍ന്നും പാര്‍ട്ടിയോടൊപ്പം ഉണ്ടാകും. ചില സമയങ്ങളില്‍ താന്‍ ഒറ്റയ്ക്കാണ് നിന്നതെന്ന് രാഹുല്‍ കത്തില്‍ കുറിക്കുന്നു.
ഞാന്‍ പൊരുതിയത് ഞാന്‍ ഇന്ത്യയെ സ്‌നേഹിക്കുന്നതുകൊണ്ടാണ്. ചില സമയങ്ങളില്‍ ഞാന്‍ പൂര്‍ണമായും ഒറ്റയ്ക്കായിരുന്നു. അതില്‍ എനിക്ക് അങ്ങേയറ്റം അഭിമാനമുണ്ട്.രാഹുല്‍ ഗാന്ധി
ബിജെപിയോട് എനിക്ക് വെറുപ്പോ ദേഷ്യമോ ഇല്ല. പക്ഷെ, എന്റെ ശരീരത്തില്‍ ജീവനുള്ള ഓരോ സെല്ലുകളും സഹജാവബോധത്തോടെ ഇന്ത്യയേക്കുറിച്ചുള്ള അവരുടെ ആശയത്തെ എതിര്‍ക്കും. 2019 തെരഞ്ഞെടുപ്പില്‍ കോണ്‍ഗ്രസ് പോരാടിയത് ഒരു രാഷ്ട്രീയ പാര്‍ട്ടിയോട് അല്ലെന്നും ഇന്ത്യന്‍ ഭരണകൂടത്തിന്റെ സംവിധാനങ്ങളോട് മുഴുവനായാണെന്നും രാഹുല്‍ കത്തില്‍ പറയുന്നു.
താന്‍ ഇനി മുതല്‍ പാര്‍ട്ടി പ്രസിഡന്റ് അല്ല എന്ന് പ്രഖ്യാപിച്ച് മണിക്കൂറുകള്‍ക്ക് ശേഷമാണ് രാഹുല്‍ രാജിക്കത്ത് ട്വീറ്റ് ചെയ്ത്. പുതിയ അദ്ധ്യക്ഷനെ ഒരു ആഴ്ച്ചയ്ക്കകം ചുമതലപ്പെടുത്തുമെന്നാണ് പാര്‍ട്ടിയോട് അടുത്ത വൃത്തങ്ങള്‍ സൂചിപ്പിക്കുന്നത്.