ഇറാഖിലെ രണ്ട് സൈനിക താവളങ്ങള്‍ക്ക് നേരെ ഇറാന്‍ നടത്തിയ മിസൈല്‍ ആക്രമണത്തില്‍ 80 അമേരിക്കന്‍ സൈനികര്‍ കൊല്ലപ്പെട്ടതായി റിപ്പോര്‍ട്ട്. ഇറാന്‍ മാധ്യമങ്ങളെ ഉദ്ധരിച്ച് വാര്‍ത്താ ഏജന്‍സികളാണ് ഇക്കാര്യം റിപ്പോര്‍ട്ട് ചെയ്തിരിക്കുന്നത്. എന്നാല്‍ ആക്രമണത്തില്‍ ഒരാള്‍ പോലും മരിച്ചിട്ടില്ലെന്ന വാദവുമായി അമേരിക്കയും രംഗത്തെത്തിയിട്ടുണ്ട്. പ്രാദേശിക സമയം പുലര്‍ച്ചെ ഒന്നരയോടെയായിരുന്നു ആക്രമണമുണ്ടായത്. അല്‍ അസദ്, ഇര്‍ബില്‍ എന്നിവിടങ്ങളിലെ അമേരിക്ക-ഇറാഖ് സഖ്യ സേനകളുടെ വ്യോമതാവളങ്ങളായിരുന്നു ഇറാന്‍ ആക്രമിച്ചത്. സ്വയം പ്രതിരോധത്തിന് വേണ്ടി അമേരിക്കന്‍ ചട്ട പ്രകാരമുള്ള നടപടി മാത്രമായിരുന്നു ഇതെന്നാണ് ആക്രമണത്തിന് പിന്നാലെ ഇറാന്‍ വിദേശകാര്യ മന്ത്രി പ്രതികരിച്ചത്.
ദ ക്യു’ ഇപ്പോള്‍ ടെലഗ്രാമിലും ലഭ്യമാണ്. കൂടുതല്‍ വാര്‍ത്തകള്‍ക്കും അപ്‌ഡേറ്റുകള്‍ക്കുമായി ടെലഗ്രാം ചാനല്‍ സബ്‌സ്‌ക്രൈബ് ചെയ്യാം
ഇറാഖില്‍ നിലയുറപ്പിച്ച അമേരിക്കയുടെയും സഖ്യസേനകളുടെയും കേന്ദ്രങ്ങളിലേക്ക് പന്ത്രണ്ടോളം ബാലിസ്റ്റിക് മിസൈലുകള്‍ ഉപയോഗിച്ച് ഇറാന്‍ ആക്രമണം നടത്തിയതായി അമേരിക്കന്‍ പ്രതിരോധകാര്യ അസിസ്റ്റന്റ് സെക്രട്ടറി ജോനാഥന്‍ ഹോഫ്മാന്‍ വാര്‍ത്താകുറിപ്പില്‍ സ്ഥിരീകരിച്ചിരുന്നു. ആക്രമണ സമയത്ത് സൈനികര്‍ ബങ്കറുകളില്‍ ആയിരുന്നുവെന്നും അമേരിക്ക വാദിക്കുന്നുണ്ട്.
ഇറാഖിലെ അമേരിക്കന്‍ സേനാ കേന്ദ്രങ്ങളിലേക്കുള്ള ആക്രമണം സംബന്ധിച്ച വിവരങ്ങള്‍ പ്രസിഡന്റ് ഡൊണാള്‍ഡ് ട്രംപ് ദേശീയ സുരക്ഷാ സംഘവുമായി നേരിട്ട് വിലയിരുത്തിയതായി വൈറ്റ്ഹൗസ് പ്രത്യേക വാര്‍ത്താക്കുറിപ്പില്‍ അറിയിച്ചു. ജനറല്‍ മേജര്‍ ഖാസിം സുലൈമാനിയടക്കമുള്ളവരെ വ്യോമാക്രമണത്തില്‍ അമേരിക്ക കൊലപ്പെടുത്തിയതിന് പ്രതികാരമായിട്ടായിരുന്നു ഇറാന്റെ സൈനിക നടപടി. സംഘര്‍ഷ സാധ്യത കണക്കിലെടുത്ത് വിമാനക്കമ്പനികളോട് ഗള്‍ഫ് സര്‍വീസുകള്‍ നിര്‍ത്തിവെയ്ക്കാന്‍ അമേരിക്കന്‍ വ്യോമയാന അതോറിറ്റി നിര്‍ദേശിച്ചിട്ടുണ്ട്.
ദ ക്യു വീഡിയോ പ്രോഗ്രാമുകള്‍ക്കും വീഡിയോകള്‍ക്കുമായി ഞങ്ങളുടെ യൂട്യൂബ് ചാനല്‍ ഈ ലിങ്കില്‍ സബ്‌സ്‌ക്രൈബ് ചെയ്യാം