'ഹേമ കമ്മിറ്റി റിപ്പോര്‍ട്ടിനെ സ്വാഗതം ചെയ്യുന്നു, പക്ഷേ പവര്‍ ഗ്രൂപ്പും മാഫിയയും ഇല്ല'; അമ്മ പറയുന്നതില്‍ ആത്മാര്‍ത്ഥയുണ്ടോ?
ഹേമ കമ്മിറ്റി റിപ്പോര്‍ട്ട് പുറത്തുവന്ന് നാല് ദിവസത്തിന് ശേഷമാണ് താരസംഘടനയായ അമ്മ പ്രതികരിച്ചത്. റിപ്പോര്‍ട്ടില്‍ നിന്ന് ഒളിച്ചോടിയിട്ടില്ലെന്നും മറ്റു തിരക്കുകളായതിനാലാണ് പ്രതികരണം വൈകിയതെന്നുമൊക്കെയാണ് ജനറല്‍ സെക്രട്ടറി സിദ്ദീഖ് മാധ്യമങ്ങളോട് പറഞ്ഞത്. റിപ്പോര്‍ട്ടിനെ അമ്മ സ്വാഗതം ചെയ്യുകയാണെന്നും അതിലെ നിര്‍ദേശങ്ങള്‍ നടപ്പാക്കണമെന്നും സിദ്ദീഖ് പറയുന്നുണ്ടെങ്കിലും ഹേമ കമ്മിറ്റി നടത്തിയ കണ്ടെത്തലുകള്‍ പാടെ നിരാകരിക്കുകയാണ് സംഘടന. പവര്‍ ഗ്രൂപ്പ്, മാഫിയ തുടങ്ങിയവ ഇല്ലെന്നും കാസ്റ്റിംഗ് കൗച്ച് നടന്നതായി അറിയില്ലെന്നുമാണ് അദ്ദേഹത്തിന്റെ വിശദീകരണം. വിവരാവകാശ കമ്മീഷന്‍ നിര്‍ദേശം അനുസരിച്ച് സ്വകാര്യത പുറത്തു വരുന്ന വിവരങ്ങള്‍ പൂര്‍ണ്ണമായും ഒഴിവാക്കിക്കൊണ്ടുള്ള റിപ്പോര്‍ട്ടാണ് സര്‍ക്കാര്‍ പുറത്തുവിട്ടത്. അതിനെ പൂര്‍ണ്ണമായും മുതലെടുത്തുകൊണ്ടുള്ള പ്രതികരണമാണ് താരസംഘടന നടത്തിയത്. പ്രതികരിക്കേണ്ടത് നിര്‍ബന്ധമായതുകൊണ്ടു മാത്രം എവിടെയും തൊടാതെ നടത്തിയ പ്രതികരണമായിരുന്നു അമ്മയുടേത്. താര സംഘടന ആരെയാണ് സംരക്ഷിക്കാന്‍ ശ്രമിക്കുന്നത്?