നിഖില വിമൽ പ്രധാന വേഷത്തിലെത്തുന്ന ‘പെണ്ണ് കേസ്’ എന്ന ചിത്രം റിലീസിന് ഒരുങ്ങുകയാണ്. കല്യാണ തട്ടിപ്പ് നടത്തുന്ന ഒരു സ്ത്രീയായാണ് നിഖില ഈ സിനിമയിൽ അഭിനയിക്കുന്നത്. ഈ കഥാപാത്രവും സിനിമയും തെരഞ്ഞെടുത്തതിന് പിന്നിലെ കാരണത്തെക്കുറിച്ച് നടി ഇപ്പോൾ തുറന്നുപറയുന്നു. സ്ഥിരമായി കേൾക്കുന്ന ‘എല്ലാം സഹിക്കുന്ന’ സ്ത്രീ കഥാപാത്രങ്ങളിൽ നിന്ന് വ്യത്യസ്തമായിരുന്നു ഈ കഥാപാത്രമെന്നും അതുകൊണ്ടാണ് താൻ ഈ കഥാപാത്രം തെരഞ്ഞെടുത്തതെന്നും നടി പറഞ്ഞു. ക്യു സ്റ്റുഡിയോയ്ക്ക് നൽകിയ അഭിമുഖത്തിൽ സംസാരിക്കുകയായിരുന്നു നിഖില വിമൽ.
‘കല്യാണ തട്ടിപ്പ് നടത്തുന്ന ഒരു പെണ്ണിന്റെ കഥയാണ് പെണ്ണ് കേസ് പറയുന്നത്. ഈ സിനിമയുടെ ടീം വന്ന് കഥ പറഞ്ഞപ്പോൾ “എന്തുകൊണ്ട് ഇത്തരം ഒരു സിനിമ വന്നുകൂടാ” എന്നായിരുന്നു ഞാൻ ചിന്തിച്ചത്. സമൂഹത്തിന് വലിയൊരു മെസ്സേജ് നൽകുന്ന സിനിമയല്ല ഇത്. എന്നാൽ അവരുടെ കഥ പറയുന്നതിൽ എന്താണ് തെറ്റ്? ഞാൻ കേട്ടിട്ടുള്ള എല്ലാം സഹിക്കുന്ന സ്ത്രീകളുടെ കഥകളിൽ നിന്ന് വ്യത്യസ്തമായിരുന്നു ഈ സിനിമ. അതാണ് ഈ സിനിമയിലേക്ക് എന്നെ ആകർഷിച്ച ഒരു കാര്യം,’ നിഖില വിമൽ പറഞ്ഞു.
അതേസമയം പെണ്ണ് കേസ് ജനുവരി 10 ന് റിലീസ് ചെയ്യുകയാണ്. നവാഗതനായ ഫെബിൻ സിദ്ധാർഥ് ആദ്യമായി സംവിധാനം ചെയ്യുന്ന ചിത്രത്തിന് തിരക്കഥ ഒരുക്കിയിരിക്കുന്നത് രശ്മി രാധാകൃഷ്ണനും ഫെബിൻ സിദ്ധാർഥും ചേർന്നാണ്. ചിത്രത്തിൽ നിഖിലയ്ക്കൊപ്പം ഹക്കീം ഷാജഹാൻ, അജു വർഗ്ഗീസ്, രമേശ് പിഷാരടി എന്നിവരും പ്രധാന കഥാപാത്രങ്ങളായി എത്തുന്നുണ്ട്.
ഇർഷാദ് അലി, അഖിൽ കവലയൂർ, കുഞ്ഞികൃഷ്ണൻ, ശ്രീകാന്ത് വെട്ടിയാർ, ജയകൃഷ്ണൻ, പ്രവീൺ രാജാ, ശിവജിത്, കിരൺ പീതാംബരൻ, ഷുക്കൂർ, ധനേഷ്, ഉണ്ണി നായർ, രഞ്ജി കങ്കോൽ, സഞ്ജു സനിച്ചൻ, ലാലാ മലപ്പുറം, ശ്രീരേഖ, അനാർക്കലി, ആമി, സന്ധ്യ മനോജ്, ലാലി തുടങ്ങിയവരാണ് ചിത്രത്തിലെ മറ്റു പ്രധാന വേഷങ്ങളിൽ എത്തുന്നത്.
ഇ4 എക്സിപിരിമെന്റ്സ്, സീ സ്റ്റുഡിയോസ്, ലണ്ടൻ ടാക്കീസ് എന്നീ ബാനറുകളിൽ മുകേഷ് ആർ.മേത്ത, ഉമേഷ്.കെ.ആർ ബൻസാൽ, രാജേഷ് കൃഷ്ണ, സി.വി.സാരഥി എന്നിവർ ചേർന്ന് നിർമിക്കുന്ന 'പെണ്ണ് കേസി'ന്റെ ഛായാഗ്രഹണം നിർവഹിച്ചിരിക്കുന്നത് ഷിനോസ് ആണ്.ജ്യോതിഷ്.എം, സുനു.എ.വി, ഗണേഷ് മലയത്ത് എന്നിവർ സംഭാഷണം എഴുതിയിരിക്കുന്ന ചിത്രത്തിന്റെ സഹനിർമാണം അക്ഷയ് കെജ്രിവാളും അശ്വതി നടുത്തൊടിയും ചേർന്നാണ് നിർവഹിക്കുന്നത്. പ്രൊഡക്ഷൻ ഡിസൈനർ അർഷദ് നക്കോത്ത്, എക്സിക്യൂട്ടീവ് പ്രൊഡ്യൂസർ വിനോദ് രാഘവൻ, സംഗീതം അങ്കിത് മേനോൻ, എഡിറ്റർ ഷമീർ മുഹമ്മദ് തുടങ്ങിയവരാണ് സിനിമയുടെ മറ്റു അണിയറപ്രവർത്തകർ.
