മലയാളത്തിലെ വിഷു റിലീസ് ചിത്രങ്ങളുടെ മുഴുവൻ കളക്ഷനെയും അഞ്ച് ദിവസത്തിൽ തൂക്കിയെറിഞ്ഞ് മോഹൻലാൽ ചിത്രം തുടരും. തരുൺ മൂർത്തിയുടെ സംവിധാനത്തിൽ മോഹൻലാൽ നായകനായി എത്തിയ ചിത്രം തുടരും. ഏപ്രിൽ 25 ന് തിയറ്ററുകളിലെത്തിയ ചിത്രം മികച്ച പ്രകടനമാണ് തിയറ്ററുകളിലും ബോക്സ് ഓഫീസിലും കാഴ്ചവയ്ക്കുന്നത്. അഞ്ച് ദിവസം കൊണ്ട് കേരളാ ബോക്സ് ഓഫീസിൽ 33.65 കോടിയാണ് തുടരും നേടിയത് എന്നാണ് അനൗദ്യോഗിക കണക്കുകൾ. വിഷു റിലീസ് ചിത്രങ്ങളായ ആലപ്പുഴ ജിംഖാന, മരണമാസ്, ബസൂക്ക എന്നീ ചിത്രങ്ങളുടെ 20 ദിവസത്തെ കേരള ബോക്സ് ഓഫീസ് കളക്ഷനാണ് വെറും 5 ദിവസം കൊണ്ട് മോഹൻലാൽ സ്വന്തമാക്കിയിരിക്കുന്നത്.
നിലവിൽ വിഷു റിലീസ് ചിത്രങ്ങളിൽ ഏറ്റവും കൂടുതൽ കളക്ഷൻ നേടിയ ചിത്രം ഖാലിദ് റഹ്മാൻ സംവിധാനം ചെയ്ത ആലപ്പുഴ ജിംഖാന ആണ്. ഏകദേശം 37.14 കോടി രൂപയാണ് ആലപ്പുഴ ജിംഖന 20 ദിവസം കൊണ്ട് കേരള ബോക്സ് ഓഫീസിൽ നിന്നും നേടിയത്. റിലീസ് ചെയ്ത് 20 ദിവസം കൊണ്ട് ബേസിൽ ചിത്രം മരണമാസ്സ് 12.69 കോടിയും മമ്മൂട്ടി ചിത്രം ബസൂക്ക 13.51 കോടിയും അജിത് ചിത്രം ഗുഡ് ബാഡ് അഗ്ലീ 4.95 കോടിയുമാണ് കേരള ബോക്സ് ഓഫീസിൽ നിന്നും ഇതുവരെ നേടിയത്. മലയാളം റിലീസുകളിൽ പ്രീ റിലീസ് ബുക്കിംഗിൽ മമ്മൂട്ടി ചിത്രം ബസൂക്കയായിരുന്നു മുന്നിൽ. 805 ഷോകൾ ആദ്യ ദിനം ചാർട്ട് ചെയ്തിരുന്ന സിനിമയുടെ അഡ്വാൻസ് സെയിൽസ് വഴി 1.50 കോടി കളക്ട് ചെയ്തിരുന്നു.
അതേസമയം അഞ്ച് ദിവസം കൊണ്ട് ആഗോള ബോക്സ് ഓഫീസിൽ തുടരും 100 കോടി കടന്നതായാണ് റിപ്പോർട്ടുകൾ. ഇതോടെ അതിവേഗത്തിൽ 100 കോടി കടക്കുന്ന ചിത്രങ്ങളുടെ പട്ടികയിലേക്ക് എത്തിയിരിക്കുകയാണ് തുടരും. ടാക്സി ഡ്രൈവർ ഷൺമുഖൻ എന്ന കഥാപാത്രമായി മോഹൻലാൽ തകർത്ത് ആടി ചിത്രം ആരാധകരെ ആവേശത്തിൽ ആഴ്ത്തിയിരിക്കുകയാണ്. പ്രേക്ഷകർ കാണാൻ ആഗ്രഹിച്ച മോഹൻലാലിന്റെ പ്രകടനമാണ് സിനിമ മുഴുവനും എന്നാണ് സിനിമ കണ്ട് പ്രേക്ഷകർ എല്ലാവരും ഒരേ സ്വരത്തിൽ പറയുന്നത്. ആദ്യ ദിനത്തിൽ മാത്രം ആഗോളതലത്തിൽ തുടരും 17 കോടിയിലധികം രൂപ നേടിയതായാണ് ട്വിറ്റർ ഫോറങ്ങൾ റിപ്പോർട്ട് ചെയ്തത്. സിനിമയ്ക്ക് പ്രേക്ഷരിൽ നിന്ന് ലഭിക്കുന്ന സ്വീകാര്യത മുൻനിർത്തി വരും ദിവസങ്ങളിലും ചിത്രത്തിന്റെ കളക്ഷൻ വർധിക്കുമെന്നാണ് വിലയിരുത്തൽ. ഫാമിലി ഡ്രാമ സ്വഭാവത്തിൽ ഒരുങ്ങിയ ചിത്രത്തിന് മികച്ച പ്രതികരണങ്ങളാണ് തിയറ്ററിൽ നിന്നും ലഭിക്കുന്നത്. മോഹൻലാലിന്റെ പെർഫോമൻസിനും ചിത്രത്തിലെ പാട്ടുകൾക്കും വൻ സ്വീകാര്യതയാണ് ലഭിക്കുന്നത്. 20 വര്‍ഷത്തിന് ശേഷം മോഹന്‍ലാല്‍- ശോഭന ജോഡി തിരിച്ചെത്തുന്ന ചിത്രം കൂടിയാണ് ഇത്.
പെർഫോമർ എന്ന തരത്തിൽ മോഹൻലാലിന്റെ കംബാക്ക് ആണ് തുടരും എന്നാണ് പ്രേക്ഷകരുടെ അഭിപ്രായം. മോഹൻലാലിനെക്കൂടാതെ ചിത്രത്തില്‍ ശോഭന, പ്രകാശ് വര്‍മ, ബിനു പപ്പു, ഫര്‍ഹാന്‍ ഫാസില്‍, മണിയന്‍പിള്ള രാജു, തോമസ് മാത്യു, ഇര്‍ഷാദ് തുടങ്ങിയവരാണ് മറ്റ് പ്രധാന വേഷങ്ങളിൽ എത്തിയിരിക്കുന്നത്. പൃഥ്വിരാജ് സംവിധാനം ചെയ്ത ഇൻഡസ്ട്രി ഹിറ്റ് ചിത്രമായ എമ്പുരാന്റെ റെക്കോര്‍ഡ് തകര്‍ത്താണ് തുടരും മലയാള സിനിമയില്‍ പുതിയ ചരിത്രം സൃഷ്ടിച്ചിരിക്കുന്നത്. രജപുത്ര വിഷ്വൽ മീഡിയയുടെ ബാനറിൽ എം.രഞ്ജിത്ത് നിർമ്മിച്ച ചിത്രത്തിന്റെ തിരക്കഥ കെ ആർ സുനിലും തരുൺ മൂർത്തിയുമാണ്. ഷാജി കുമാര്‍ ആണ് ചിത്രത്തിന്റെ ഛായാഗ്രഹണം നിർവഹിച്ചിരിക്കുന്നത്. എഡിറ്റിംഗ് നിഷാദ് യൂസുഫ്, ഷെഫീഖ് വി ബി, സംഗീതം ജേക്സ് ബിജോയ്.
