'നെല്ലിക്കാംപൊയിൽ നൈറ്റ് റൈഡേഴ്‌സ്' എന്ന ചിത്രത്തിലെ മാത്യു തോമസിന്റെ കോസ്റ്റ്യൂംസിന് റഫറൻസ് ആയത് വിജയ് ചിത്രങ്ങൾ എന്ന് കോസ്റ്റ്യൂം ഡിസൈനർ മെൽവി.ജെ. ഒരു സാങ്കൽപിക ഗ്രാമത്തിന്റെ പശ്ചാത്തലത്തിലാണ് സിനിമയുടെ കഥ പറയുന്നത് എന്നും ഗില്ലി ഉൾപ്പടെയുള്ള വിജയ് സിനിമകളാണ് ഈ ചിത്രത്തിലെ നായിക-നായകന്മാരുടെ കോസ്റ്റ്യൂംസിന് റഫറൻസ് എന്നും മെൽവി ക്യു സ്റ്റുഡിയോയോട് വ്യക്തമാക്കി.
'മാത്യുവിന്റെ അടുത്ത ചിത്രത്തിൽ ഒരു വിജയ് സ്റ്റൈൽ ആണ് നൽകിയിരിക്കുന്നത്. നെല്ലിക്കാംപൊയിൽ നൈറ്റ് റൈഡേഴ്‌സ് എന്നാണ് പേര്. ഒരു ഫിക്ഷൻ ഗ്രാമത്തിൽ നടക്കുന്ന കഥയാണ് സിനിമ പറയുന്നത്. സിനിമയുടെ കഥ സംവിധായകൻ പറഞ്ഞ് കഴിഞ്ഞപ്പോൾ മാത്യൂവിന് പഴയ വിജയ് സ്റ്റൈൽ കോസ്റ്റ്യൂം നൽകാം എന്ന് മനസ്സിൽ തോന്നി. ഞാൻ ഒരു പഴയ വിജയ് ആരാധകനാണ്. അദ്ദേഹത്തിനോടുള്ള ആരാധന ഞാൻ ഇവിടെ ഉപയോഗിച്ചിട്ടുണ്ട്. ഗില്ലി ഉൾപ്പടെയുള്ള പല സിനിമകളും ഞങ്ങൾ റഫറൻസ് ആയി എടുത്തിട്ടുണ്ട്,' മെൽവി.ജെ പറഞ്ഞു.
പ്രശസ്ത എഡിറ്റർ നൗഫൽ അബ്ദുള്ള ആദ്യമായി സംവിധാനം ചെയ്യുന്ന ചിത്രമാണ് 'നെല്ലിക്കാംപൊയിൽ നൈറ്റ് റൈഡേഴ്‌സ്'. എ ആന്‍ഡ് എച്ച്.എസ്. പ്രൊഡക്ഷന്‍സിന്റെ ബാനറില്‍ അബ്ബാസ് തിരുനാവായ, സജിന്‍ അലി, ഹംസ തിരുനാ വായ എന്നിവര്‍ ചേര്‍ന്നാണ് ചിത്രം നിർമ്മിച്ചിരിക്കുന്നത്. ‘പ്രണയവിലാസം’ എന്ന ചിത്രത്തിന്റെ എഴുത്തുകാരായ ജ്യോതിഷ് എം, സുനു എ.വി. എന്നിവരാണ് ചിത്രത്തിൻ്റെ രചന നിർവഹിച്ചത്. ഒക്ടോബർ 10 നാണ് ചിത്രം ആഗോള റിലീസായി എത്തുന്നത്.
മാത്യു തോമസിനെ കൂടാതെ, മീനാക്ഷി ഉണ്ണികൃഷ്ണന്‍, അബു സലിം, റോണി ഡേവിഡ് രാജ്, വിഷ്ണു അഗസ്ത്യ, റോഷന്‍ ഷാനവാസ് (ആവേശം ഫെയിം), ശരത് സഭ, മെറിന്‍ ഫിലിപ്പ്, സിനില്‍ സൈനുദ്ദീന്‍, നൗഷാദ് അലി, നസീര്‍ സംക്രാന്തി, ചൈത്ര പ്രവീണ്‍ എന്നിവരാണ് ചിത്രത്തിലെ മറ്റു പ്രധാന താരങ്ങൾ. നെല്ലിക്കാംപൊയില്‍ എന്ന ഗ്രാമത്തില്‍ നടക്കുന്ന സംഭവമാണ് ചിത്രത്തിൽ അവതരിപ്പിക്കുന്നത്.
വിമല്‍ ടി.കെ, കപില്‍ ജാവേരി, ഗുര്‍മീത് സിങ് എന്നിവരാണ് ചിത്രത്തിന്റെ സഹനിര്‍മ്മാണം. എക്‌സിക്യൂട്ടീവ് പ്രൊഡ്യൂസര്‍ - ബിജേഷ് താമി, ഛായാഗ്രഹണം- അഭിലാഷ് ശങ്കര്‍, എഡിറ്റര്‍- നൗഫല്‍ അബ്ദുള്ള, മ്യൂസിക്- യാക്‌സന്‍ ഗാരി പെരേര, നേഹ എസ്. നായര്‍, സംഘട്ടനം- കലൈ കിങ്സ്റ്റന്‍, സൗണ്ട് ഡിസൈന്‍- വിക്കി, ഫൈനല്‍ മിക്‌സ്- എം.ആര്‍. രാജാകൃഷ്ണന്‍, വസ്ത്രാലങ്കാരം- മെല്‍വി ജെ, വിഎഫ്എക്‌സ്- പിക്‌റ്റോറിയല്‍ എഫ്എക്‌സ്, മേക്കപ്പ്- റോണക്‌സ് സേവ്യര്‍, ആര്‍ട്ട് ഡയറക്റ്റര്‍- നവാബ് അബ്ദുള്ള, ചീഫ് അസ്സോസിയേറ്റ് ഡയറക്ടര്‍- ഫിലിപ്പ് ഫ്രാന്‍സിസ്, പ്രൊഡക്ഷന്‍ കണ്‍ട്രോളര്‍- ഡേവിസണ്‍ സി.ജെ, പിആർഒ - വൈശാഖ് സി വടക്കേവീട്, ജിനു അനിൽകുമാർ.
