SHOW TIME

ആരോടും പറഞ്ഞില്ല, ഇതൊന്നും നടക്കില്ലെന്നായിരുന്നു മനസില്‍, അനുരാഗ് കശ്യപിന്റെ നായകനായതിനെക്കുറിച്ച് റോഷന്‍

മൂത്തോന്‍ എന്ന സിനിമ തിയറ്ററുകളിലെത്തുംമുമ്പേ സിനിമയില്‍ അമീറിനെ അവതരിപ്പിച്ച റോഷന്‍ മാത്യുവിന് ലഭിച്ചത് ബോളിവുഡില്‍ നിന്ന് വമ്പന്‍ ഓഫര്‍ ആണ്. ഇന്ത്യന്‍ സിനിമയിലെ പ്രധാന അഭിനേതാക്കളിലേറെയും അഭിനയിക്കണമെന്ന് ആഗ്രഹിക്കുന്ന സംവിധായകനില്‍ നിന്ന്. അനുരാഗ് കശ്യപിന്റെ പുതിയ ഹിന്ദി സിനിമയിലെ നായക വേഷം. ചോക്ക്ഡ് എന്ന സിനിമയിലെ നായക വേഷത്തിലേക്ക് സെലക്ട് ചെയ്യപ്പെട്ടതിനെക്കുറിച്ച് റോഷന്‍ ദ ക്യു ഷോ ടൈം അഭിമുഖത്തില്‍ സംസാരിക്കുന്നു.

അനുരാഗ് കശ്യപ് ചിത്രത്തിലേക്കുള്ള ക്ഷണം

2018 ഓഗസ്റ്റിലോ സെപ്റ്റംബറിലോ വെറുതെ വീട്ടിലിരിക്കുമ്പോ ഗീതു മെസ്സേജ് അയച്ചു. ലക്ഷദ്വീപിലെ സീനുകളുടെ ഫൈനല്‍ എഡിറ്റിങ് കഴിഞ്ഞ് അനുരാഗ് കണ്ടപ്പോ എന്റെ അഭിനയം ഇഷ്ടമായെന്ന്. അതുകേട്ട് ഞാന്‍ വളരെ എക്സൈറ്റഡായി. അടുത്ത മെസേജ് അനുരാഗിന് എന്നോട് സംസാരിക്കണം എന്നായിരുന്നു. ഓക്കെ പറഞ്ഞ് നിമിഷങ്ങള്‍ക്കുള്ളില്‍ പുള്ളി ഫോണ്‍ വിളിച്ചു. അഭിനയം നന്നായി, ഇതൊരു ബ്രേക്ക് ത്രൂ പെര്‍ഫോമന്‍സ് ആണ് എന്നൊക്കെ പറഞ്ഞു. എനിക്ക് ഭയങ്കര സന്തോഷമായി. നിങ്ങളെവിടുന്നാണെന്ന് ചോദിച്ചു. അപ്പോള്‍ ഞാന്‍ നാടകങ്ങളുമായി ബോംബെയില്‍ ഉണ്ടായിരുന്നെന്ന് പറഞ്ഞു. ഹോ..! എന്നിട്ട് ഞാനെങ്ങനെ നിന്നെ അറിയാതെ പോയെന്നായി... അദ്ദേഹം എങ്ങനെ എന്നെ അറിയാനാണ്.. എന്തായാലും അഭിനയം ഒരുപാടിഷ്ടമായി, നമുക്കൊന്നിച്ച് ഒരു സിനിമ ചെയ്യാമെന്ന് പറഞ്ഞു. ഞാന്‍ ഒരു സ്‌ക്രിപ്റ്റ് അയച്ചുതരാമെന്ന് പറഞ്ഞ് സ്‌ക്രിപ്റ്റ് അയച്ചുതന്നു. ഞാനത് ഒറ്റയിരുപ്പില്‍ വായിച്ചു. ഓക്കെ പറയാന്‍ തിരിച്ചു വിളിച്ചിട്ട് ഫോണ്‍ എടുത്തില്ല. അപ്പോള്‍ ഞാന്‍ മെയില്‍ അയച്ചിട്ടു. ഇതൊന്നും ആരോടും പറഞ്ഞതുമില്ല. ഇതൊന്നും നടക്കാന്‍ പോകുന്നില്ലെന്നായിരുന്നു മനസ്സില്‍. രണ്ട് ദിവസം കഴിഞ്ഞപ്പോഴേക്കും അനുരാഗ് സാറിന്റെ മെസേജ് വന്നു. അടുത്തകൊല്ലം ജൂണ്‍-ജൂലായ് മാസം നമുക്ക് പടം ചെയ്യാമെന്ന് പറഞ്ഞു.ബോംബെയില്‍ എത്തുമ്പോള്‍ പറയണം, മീറ്റ് ചെയ്യാമെന്ന് സാറ് പറഞ്ഞു. തൊട്ടപ്പന്‍ സിനിമയുടെ ഷൂട്ടിങ് കഴിഞ്ഞുടനെ ഞാന്‍ അങ്ങോട്ട് പോയി. മീറ്റിങ് കഴിഞ്ഞിട്ടും ഞാന്‍ ഇത് നടക്കുമെന്ന് വിശ്വസിച്ചിരുന്നില്ല. ഗീതു പറഞ്ഞ് നിവിനേട്ടനും ബാക്കിയുള്ളവരുമൊക്കെ അറിഞ്ഞ് അഭിന്ദനങ്ങള്‍ പറയാന്‍ തുടങ്ങി. ആകെ രാജീവേട്ടന്‍ മാത്രമാണ് പറഞ്ഞത്, നീ ഇതൊന്നും കേട്ട് വിശ്വസിക്കേണ്ട. മന്‍മര്‍സിയായില്‍ ഇതുപോലെ ഒരാളെ കാസ്റ്റ് ചെയ്തിട്ട് അവസാന നിമിഷം മാറ്റിയിട്ടുണ്ടെന്ന്. അപ്പോള്‍ ഞാന്‍ എല്ലാരോടും പറഞ്ഞു ആ.. ഇതാണ് ഞാന്‍ ആരോടും പറയാത്തതെന്ന്

മൂത്തോന് ശേഷം ആഷിക് അബു സംവിധാനം ചെയ്ത ഹ്രസ്വസിനിമ പെണ്ണും ചെറുക്കനും, മുസ്തഫയുടെ സംവിധാനത്തില്‍ കപ്പേള എന്നിവയാണ് റോഷന്‍ അഭിനയിക്കുന്ന സിനിമകള്‍.