ബി.ജെ.പി സംസ്ഥാന സമിതി അംഗത്തെ ഗവര്‍ണര്‍ ആരിഫ് മുഹമ്മദ് ഖാന്റെ സ്റ്റാഫില്‍ നിയമിക്കാന്‍ നീക്കം. മാധ്യമപ്രവര്‍ത്തകന്‍ കൂടിയായ ഹരി.എസ്.കര്‍ത്തയെയാണ് സ്റ്റാഫില്‍ നിയമിക്കാന്‍ നിര്‍ദേശിച്ചിരിക്കുന്നത്. ജന്‍മഭൂമി പത്രാധിപരായിരുന്നു ഹരി.എസ്.കര്‍ത്ത. കുമ്മനം രാജശേഖരന്‍ ബി.ജെ.പി സംസ്ഥാന പ്രസിഡന്റായിരുന്നപ്പോള്‍ മാധ്യമ വിഭാഗം തലവനായും പ്രവര്‍ത്തിച്ചിട്ടുണ്ട്.
രാജ്ഭവനില്‍ നിന്നുള്ള ശുപാര്‍ശ സംസ്ഥാന സര്‍ക്കാരിന് മുന്നിലാണ്. ഗവര്‍ണറുടെ അഡീഷണല്‍ പേഴ്‌സണല്‍ അസിസ്റ്റന്റായി ഹരി.എസ്.കര്‍ത്തയെ നിയമിക്കണമെന്നാണ് ശുപാര്‍ശ. നിയമനം സര്‍ക്കാര്‍ അംഗീകരിക്കണം.
സംസ്ഥാന സര്‍ക്കാരും ഗവര്‍ണരും തമ്മില്‍ തര്‍ക്കത്തിന് പിന്നില്‍ ബി.ജെ.പിയും കേന്ദ്ര സര്‍ക്കാരുമാണെന്ന ആരോപണം ഉയരുന്നതിനിടെയാണ് സംസ്ഥാന സമിതി അംഗത്തെ തന്നെ പ്രധാന ചുമതലയിലേക്ക് കൊണ്ടുവരാന്‍ നീക്കം നടത്തുന്നത്.
