‘മുമ്പ് ആര്‍എസ്എസ് പ്രവര്‍ത്തകനായിരുന്നു, പതിവായി ശാഖയില്‍ പോയിരുന്നു’, തിരിച്ചറിവ് വന്നതോടെ മാറിയെന്ന് കണ്ണന്‍ ഗോപിനാഥന്‍
കോളേജില്‍ പഠിക്കുന്ന കാലത്തുവരെ താന്‍ ആര്‍എസ്എസ് പ്രവര്‍ത്തകനായിരുന്നുവെന്ന് വെളിപ്പെടുത്തി, രാജിവെച്ച ഐഎഎസ് ഉദ്യോഗസ്ഥന്‍ കണ്ണന്‍ ഗോപിനാഥന്‍. തിരിച്ചറിവ് വന്നതോടെ ആര്‍എസ്എസ് പ്രവര്‍ത്തനം അവസാനിപ്പിക്കുകയായിരുന്നുവെന്നും കണ്ണന്‍ ഗോപിനാഥന്‍ ന്യൂസ് 18ന് നല്‍കിയ അഭിമുഖത്തില്‍ പറഞ്ഞു.
‘ദ ക്യു’ ഇപ്പോള്‍ ടെലഗ്രാമിലും ലഭ്യമാണ്. കൂടുതല്‍ വാര്‍ത്തകള്‍ക്കും അപ്‌ഡേറ്റുകള്‍ക്കുമായി ടെലഗ്രാം ചാനല്‍ സബ്‌സ്‌ക്രൈബ് ചെയ്യാം
കോളേജില്‍ പഠിക്കുന്ന സമയത്ത് അവരുടെ വേഷമൊക്കെ ധരിച്ച് പതിവായി ശാഖയില്‍ പോകുമായിരുന്നു. ഒരിക്കല്‍ ആര്‍എസ്എസ് റാലിക്കായി റാഞ്ചിവരെ പോയിട്ടുണ്ട്. അവരുടെ ദേശസങ്കല്‍പ്പം വേറെയാണെന്നും, തിരിച്ചറിവ് വന്നതോടെയാണ് ആര്‍എസ്എസ് പ്രവര്‍ത്തനം അവസാനിപ്പിച്ചതെന്നും കണ്ണന്‍ ഗോപിനാഥന്‍ പറഞ്ഞു.
സിവില്‍ സര്‍വീസില്‍ നിന്ന് ഏറെ നിരാശയോടെയാണ് രാജിവെച്ചതെന്നും കണ്ണന്‍ ഗോപിനാഥന്‍ വ്യക്തമാക്കി. കാശ്മീരിന് പ്രത്യേക പദവി നല്‍കിയിരുന്ന ആര്‍ട്ടിക്കിള്‍ 370 റദ്ദാക്കിയതടക്കമുള്ള വിഷയങ്ങളില്‍ കേന്ദ്രസര്‍ക്കാര്‍ നയങ്ങളോട് വിയോജിച്ചാണ് മലയാളി ഐഎഎസ് ഉദ്യോഗസ്ഥനായിരുന്ന കണ്ണന്‍ ഗോപിനാഥന്‍ രാജിവെച്ചത്.
